Кездесуде палата спикері меймандарға ілтипат білдіріп, Қазақстан мен Франция арасындағы сындарлы әрі стратегиялық байланысқа жоғары баға берді. Сондай-ақ ол Франция еліміздің Еуропалық одақтағы маңызды әрі сенімді серіктесі екенін айтты. М.Әшімбаев екі мемлекет арасында, ең алдымен, жоғары деңгейде тұрақты саяси диалог жолға қойылғанын да ерекше атап өтті.
«Қазақстан мен Франция екіжақты ынтымақтастықтың барлық бағытында берік байланыс орнатып, нақты нәтижелерге қол жеткізіп келеді. Бұл – ең алдымен, жоғары деңгейдегі сындарлы саяси диалогтің нәтижесі. Кейінгі үш жылда жоғары деңгейде маңызды сапарлар ұйымдастырылды. Президент Қасым-Жомарт Тоқаев Францияға ресми және мемлекеттік сапармен екі рет барды. Франция Президенті Эмманюэль Макрон 2023 жылы елімізге ресми сапармен келді. Сол кездесулердің нәтижесінде екіжақты қатынастар берік стратегиялық серіктестік деңгейіне көтерілді. Осы орайда Сіздің бұл сапарыңыздың да маңызы жоғары. Біз екі ел арасындағы парламентаралық байланысты одан әрі кеңейтуге мүдделіміз», деп Сенат төрағасы заң шығарушы органдар арасындағы байланысты жандандыру мәселесі жөнінде сөз қозғады.
Сонымен қатар М.Әшімбаев еліміздегі әлеуметтік-экономикалық, саяси жаңғыру үдерістерін, республикалық референдумның қорытындысын сөз етті. Соның аясында жаңа Конституцияның қабылдануы саяси жүйені жаңғыртудың, сондай-ақ құқықтық мемлекетті нығайтудың маңызды кезеңі екенін баса айтты.
Өз кезегінде Валери Буайе парламентаралық ықпалдастықты арттырудың маңызы жөнінде айта келе, Қазақстан мен Франция арасындағы ынтымақтастықты одан әрі нығайтуға мүдделі екенін жеткізді.
Сұхбат барысында екіжақты парламентаралық байланыстарды дамыту перспективалары да талқыланды. Атап айтқанда, достық топтары және Еуропа Кеңесінің Парламенттік Ассамблеясы мен ЕҚЫҰ Парламенттік Ассамблеясы аясындағы өзара іс-қимыл мәселелері сөз болды. Сондай-ақ сауда-экономикалық, инвестициялық серіктестікті, білім беру, өнеркәсіп, денсаулық сақтау, ауыл шаруашылығы сияқты салалардағы ынтымақтастықты кеңейту тетіктері де назардан тыс қалмады. Бұған қоса Сенат төрағасы климат, су мәселелеріне қатысты күн тәртібі аясындағы ынтымақтастықтың, сондай-ақ жасыл экономика мен атом энергетикасы салаларындағы серіктестіктің маңызы туралы пікірін білдірді.
