Марс ғаламшарының сирек кездесетін фотосы жарияланды

АҚШ-тың Аэронавтика және ғарыш кеңістігін зерттеу жөніндегі ұлттық басқармасы (НАСА) Марс ғаламшарының сирек кездесетін сәтін фотоға түсірді. Бұл сурет nasa.gov сайтында жарияланды. Осы суретке қарап ғалымдар Марстың беткі қабаты ұсақ түйіршек заттарға толы болуы мүмкін деген болжам жасады. Сондай-ақ, мамандардың пікірі бойынша түйіршек заттардың астында сирек кездесетін, бағалы минералдар болуы мүмкін. Суретте құм төбенің де бары байқалады. «Түстері ойпаттардың пішініне сәйкес қанық бола түседі», – дейді ғалымдар. Жаңа фото Марсты зерттеу үшін құрылған Mars Reconnaissance Orbiter ғарыш кемесінің бортындағы High Resolution Imaging Science Experiment (HiRISE) камерасы арқылы түсірілді. НАСА-ның сарапшылары 2020 жылы ғарыш көлігін түсіру үшін ыңғайлы орындарды қарастырып отыр. Ақпан айының басында Қызыл ғаламшардың үш бөлікке бөліп түскен фотосын жариялады. Мамандар солтүстік-шығысындағы Үлкен Сирт, Ежеро кратері және Хиллз Колумбиясының орындары ыңғайлы деген болжам жасап отыр.