фото: ашық дереккөз
Қаңтар айында қысқа және ұзақ мерзімді инфляциялық күтулер төмендегенімен, халық арасында инфляцияның әрі қарай өсетініне қатысты алаңдаушылық сақталып отыр. Бұл күтулер қазіргі нақты инфляция деңгейінен де жоғары.
Өңірлерде инфляция баяулағанымен, азық-түлікке жатпайтын тауарлар қымбаттай түсті
Инфляцияға әсер ететін факторлар әрқилы сипатта қалыптасқан.Бір жағынан, ұлттық валютаның нығаюы, фискалдық импульстің төмендеуі және әлемдік азық-түлік инфляциясының бәсеңдеуі оң нышан ретінде көрініс тауып отыр. Екінші жағынан, Ресейдегі инфляцияның жеделдеуі және өткен жылдың соңында ақша массасының күрт өсуі бағаның көтерілуіне түрткі болатын негізгі факторлар болып саналады.
Теңгенің нығаюы ішкі валюта нарығындағы сауда-саттық көлемінің төмендеуімен қатар жүрді. Сонымен қатар Ұлттық банк пен квазимемлекеттік компаниялар тарапынан шетелдік валютаны сатудың салыстырмалы көлемі өткен жылғы көрсеткіштермен салыстырғанда айтарлықтай қысқарған.
2025 жыл бойы байқалған алтын-валюта портфелі құрылымының кезең-кезеңімен өзгеру процесі әлі де жалғасып жатыр. Халықаралық резервтердегі алтын үлесінің артуы оның физикалық көлемінің молаюымен де, бағасының өсуімен де байланысты. Бұл үрдіс шетел валютасында сақталған резервтер үлесінің азаюымен қатар жүріп жатыр.
