Елсияр Қанағатов: Денис өзінің мықтылығын әлі де дәлелдейді

Жапонияның Саппоро қаласында өткен VIII қысқы Азия ойындарында қазақстандық мәнерлеп сырғанаушы Денис Тен 9-орынға ие болған еді. ҚР Мәдениет және спорт министрлігі спорт және дене шынықтыру істері комитетінің төрағасы Елсияр Қанағатов спортшы үмітті неліктен ақтай алмағандығын айтты. «Денис Тен Азия ойындарында сәтсіз өнер көрсетті. Әрине, жоғары нәтиже күткеніміз анық. Бірақ бәріне түсіністікпен қарайық. Спортшы әрқашан бабында бола бермейді. Жарақат алып қалатын сәттері болады. Одан бөлек психологиялық қысым бар. Спорт болғандықтан жеңіліс те болып тұрады», – деді ол. Елсияр Қанағатов Денистің алдағы дүбірлі додада тұғырдан көрінетіндігіне сенім білдірді. «Денис алдағы уақытта өзінің мықты спортшы екендігін дәлелдейді деп ойлаймын. Халықаралық сайыстарда намысты қолдан бермеуге тырысады деген үміттемін», – деді комитет төрағасы. Айта кетейік, Жапонияда өткен VІІІ қысқы Азия ойындарында Денис Тен қысқа бағдарламасында ұз айдынына шыға салып бір рет құлап қалған. Осы сәтсіздіктен кейін төрешілер бар-жоғы 72,98 балл берді.