Салтанатты іс-шара Ақмола облысы, Ақкөл ауданының орталығында өтті. Заман талабына сай жабдықталып, қажетті құрал-сайманмен толыққанды жарақталған өрт сөндіру техникаларының кілтін таратпас бұрын бірқатар орманшы құрметке бөленді. Экология және табиғи ресурстар вице-министрі Нұркен Шәрбиев пен Ақмола облысы әкімінің орынбасары Алтынай Әміренова аттан түспей қырағылық танытып, қоршаған ортаның тыныштығын қарауылдайтын орман шаруашылығы саласының озат еңбеккерлеріне құрмет грамоталарын табыстады.
«2023 жылдан бастап Президенттің тапсырмасымен Үкімет тарапынан өртке қарсы техниканы жаңғыртуға бағытталған ауқымды бағдарлама қолға алынды. Бүгін де сондай игі істің куәсі болып отырмыз. 2024–2025 жылдары республикалық, жергілікті бюджет қаражаты есебінен 21,5 млрд теңге бөлініп, 92 өрт сөндіру машинасы, 118 шағын орман патрульдік кешені, 244 трактор, 240 патрульдік машина, сонымен қатар 3 мыңнан аса басқа да техника сатып алынды», деді Н.Шәрбиев. Вице-министр лизингтік қаражат есебінен 35 млрд теңгеге 1057 бірлік өртке қарсы техника сатылып алынатынын, оның ішінде 333 өрт сөндіру машинасы, 350 трактор мен 374 орман патрульдік шағын кешені болатынын атап өтті.
«Мемлекеттің қолдауымен берілген мұндай техникалар орман өртінің алдын алып, қауіп-қатерді болдырмау мақсатында беріліп отыр. Қоршаған ортаны көмкерген орман – еліміздің баға жетпес байлығы, бабаларымыздың ұрпақтан-ұрпаққа мұраға қалдырған игілігі мен дәулеті. Халық байлығын көздің қарашығындай сақтап, аялап өсіріп, күтіп-баптайтын орманшылардың еңбегі әрқашан құрметке лайық», деді А.Әміренова.
«Бұған дейін де біздің орман шаруашылығына өрт сөндіру техникасы берілген. Бүгін тағы да заман талабына сай техниканы тізгіндегенімізге қуаныштымыз. Жылдың төрт мезгілінде де босаңдық танытпай, қырағылықпен орманның тыныс-тіршілігін қадағалайтын әріптестеріміз бүгін марапат алып, құрметке бөленді. Ең бастысы тілсіз жау өрт тұтанбасын деп тілейміз. Ертеректе орманшылардың айлық еңбекақысы да мардымсыз еді, бір-екі жылдың бедерінде еселеніп артты. Мұның өзі де – бізге ерекше демеу», дейді орман шаруашылығының директоры Еркін Хайдарұлы.
Отандық техника өндірісінің өнімі саналатын техниканы құрастырушылар орман өртін сөндіруші мамандардың да ұсыныс, пікірлерін ескерген. Сыйымдылығы 3 тонна су арқалаған көлік өрт ошағының үстіне дейін жақындай алады. Резеңке дөңгелектеріне де өзі су бүркіп, өртену қауіптілігін төмендетеді. Өзін-өзі сөндіру құрылғысы бірден іске қосылып, өрт сөндіру барысында қатар қызмет атқарады.
Ақмола облысының орман мекемелеріне былтыр 30 трактор мен 31 31 орман патрульдік шағын кешені берілген. Биыл үлестірілуге тиіс 24 өрт сөндіру көлігінің қалған 11-і мамыр айында жеткізіледі.
Экология және табиғи ресурстар министрлігінің мәліметінше, 2011–2023 жылдар аралығында орман және табиғатты қорғау мекемелерінің материалдық-техникалық базасы жаңартылмаған. Бүгінде еліміздің тракторлар мен кіші орман өрт сөндіру кешендерін жеткізу толық аяқталды, сондай-ақ 152 өрт сөндіру автокөлігі берілді. Биылғы мамырдың аяғына дейін тағы 168 өрт сөндіру автокөлігі таратылмақшы. Мұның барлығы да елдің өрт қаупі жоғары өңірлеріндегі мемлекеттік орман қорғаушыларды өртке қарсы техникамен жаңартып, жабдықтауды жақсарту мақсатында іске асырылып отыр.
