Бірлестік төрағасы Увайс Джанаев өзінің отбасымен бірге №54 референдум учаскесінде дауыс берді.
– Біз отбасы болып бекітілген учаскемізге келдік. Бұл – өз азаматтық борышымызды орындаудың, сондай-ақ еліміздің болашағына деген пікірімізді білдірудің мүмкіндігі. Бүгін біздің отбасымыз үшін тағы бір маңызды қуаныш: қызымыз Сурияна өмірінде алғаш рет осындай қоғамдық-саяси іс-шараға қатысты. Қазақстан әрдайым бейбітшілік пен ізгіліктің елі болып келген. Бүкіл отбасы болып біз балаларымыз бен елдің тұрақты әрі жарқын болашағы үшін дауыс бердік, – дейді Увайс Хаважиевич.
Алғаш рет дауыс берген Сурияна Джанаеваға учаске төрағасы тәтті сыйлық табыс етті.
Ал Саран қаласындағы №247 референдум учаскесінде өз таңдауын жасаған Руслан Сафаров ел ертеңіне сенімді. Ол – «Ахыска» түрік этномәдени орталығы» қоғамдық бірлестігінің Қарағанды облыстық филиалының төрағасы. Қоғамдық іс-шаралардың бел ортасында жүреді. Міне, елдің болашағына да алаңдап, достық пен бірліктің үлгісін көрсетіп, өзінің үнін қосты.
«Біздің бір ғана Отанымыз бар. Ол – Тәуелсіздігі тұғырлы Қазақ елі. Сондықтан, біздің бірлестік өкілдері бүгінгі маңызды іс-шараға бейжай қарай алмайды. Барлығы өз отбастарымен референдум учаскелеріне барып, үлестерін қосуда», дейді Руслан Сафаров.
Қарағанды облысы
