Қазақстан мен АҚШ арасындағы кеңейтілген стратегиялық әріптестікті нығайту аясында жасалған келісім екі мемлекеттің консулдық мекемелері, консулдық лауазымды тұлғалары және олардың отбасы мүшелері пайдаланатын өзара иммунитеттер мен артықшылықтарды күшейтіп, қызмет шарттарына оң әсерін тигізеді.
Сыртқы істер министрінің орынбасары Ержан Ашықбаев былтыр қаңтарда Тұңғыш Президент Нұрсұлтан Назарбаев АҚШ-қа ресми сапарында екіжақты қарым-қатынасты кеңейтілген стратегиялық әріптестік деңгейіне шығару туралы уағдаластыққа қол жеткізіп, соның аясында аталған келісім жасалғанын мәлімдеді. Келісімді іске асыру қос ел азаматтарының мүдделерін алға жылжыту және қорғау тиімділігін арттырады.
Бұл – Уильям Мозердің АҚШ-тың Қазақстандағы елшісі ретінде қол қойған алғашқы құжаты. Ол жасалған келісім екі ел үшін маңызды саяси тапсырма екенін, бұл туризмді түлету, экономиканы дамыту, инвестиция тарту саласында байланысты нығайтуға септігін тигізетінін жеткізді. Сондай-ақ екіжақты әріптестік АҚШ-тың өз уақытында Қазақстан тәуелсіздігін мойындаған кезінен басталғанын атап өтіп, 2006 жылы Нұр-Сұлтан қаласында ашылған елшілікке қоса, бүгінде Алматыда жаңа елшілік ғимаратын салуды жоспарлап жатқандарын хабарлады.
Бүгінде АҚШ аумағында Қазақстанның екі бас консулдығы жұмыс істейді. Оның бірі Нью-Йорк қаласында болса, екіншісі биыл қаңтар айында Сан-Франциско қаласында ашылды.
