Үздік пошташы Ақсуда тұрады

Орталық поштаның іші жарқырап тұр, жаңартылған, жөндеуден өткен әр кабинада корпоративтік қызмет көрсету секторы да келуші клиенттерімен қызу жұмыс жасауда. Өте тиімді әрі ыңғайлы. Заңды тұлғалар мен жеке кәсіпкерге арналған бөлім күніне 150-200 адамды қабылдап, пошталық, қаржылық, яғни ақша аудару, ақша айырбастау және газетке жазылу секілді қызмет түрлерін ұсына алады. Сондай-ақ, жақында қызметкерлері облыс орталығындағы балалар үйлеріне барып, олардың өздері қалаған газет-журналдарына жаздырып, түбіртектерін сыйға тартыпты. Айтпақшы, біздің өңірдегі Ақсу қалалық филиалының пошташысы Айгүл Жүнісова Астанада өткен пошташылар байқауына қатысып, еліміздің «Ең үздік пошташысы» атанып келді. Айгүл 7 жыл бойы қаладағы өзіне бөлінген бөлім­ше тұрғындарына газет-журналдар, хат-хабар жеткізеді. Байқауда бейнеролик арқылы өз бөлімшесінің қалай қызмет жасайтынын көрсетіп беріпті. Байқауда пошташының қызмет барысында киетін үздік киім үлгісін көрсетіп, қарапайым пошташы Айгүл барлық сауал­дарға дұрыс жауап та берген. – Бізді үйлерінде асыға күтіп отыратын зейнеткерлер, мүм­кіндігі шектеулі жандар аз емес. Пошташының вело­сипеді барлығына да тез жетуге асығады. Өзімізге ыстық «Егемен Қазақстан», облыстық «Сарыарқа самалы» газеттері де күнделікті менің сөмкемде, әр үйге уақытында жеткіземін, – дейді Айгүл. Ал «Қазпошта» АҚ бөлім­шелерін жаңғырту жұмыстары біздің облыстан басталыпты. Бұл игілікті іс аудан орта­лық­тары мен ауылдарда да жал­ғасын табады. Фарида БЫҚАЙ, «Егемен Қазақстан» ПАВЛОДАР