Билік пен азаматтық қоғам жауапкершілігі артқанының белгісі

Өкілеттіктерді билік тармақтары арасында қайта бөлу туралы әңгіме шыққалы бері қазақ қауымы Қазақстан Республикасының Конституциясына енгізілетін өзгерістер жобасын талдау-талқылауларды қызу жүргізді. Күні кеше Ақордада осы мәселе жөніндегі Жұмыс тобының қорытынды отырысы өтті. Біз аталған мәселеге байланысты белгілі саясаттанушы Айдос САРЫМҒА жолығып, бір-екі сұрақ қойған болатынбыз. – Президенттің Ақордадағы Жұмыс тобымен кешегі өткізген қоры­тынды отырысқа қатысты сіздің пікіріңізді білсек деп едік. – Жалпы, еліміздегі мүлік мәселе­сіне, оның үстіне, өткен жыл­ғы жер мәселесіне қатысты митингі­лер­дің әсері болар, елімізде біраз алаң­дау­шылық, тіпті, біраз толқу да бол­ды. Бірқатар беделді азаматтар қыз­ды-қыздымен қатты-қатты әңгіме­лер де айтып қалды. Асықпай өткізіл­ген қоғамдық талқылаулардың бары­сын, барлық жағдайын ескеріп, күні кеше Елбасымыз – Қазақстан Респуб­лика­сы­ның Тұңғыш Президенті Нұрсұлтан Назарбаев бұл мәселені одан әрі қозғаудың қажеті жоқ, 26-бап бұрынғы нұсқасында қалсын деп, өзгеріс енгізбеуді ұсынды. Бұл – біздің еліміздегі азаматтық қоғамның, зиялы қауымның пікіріне, алаңдаушылығына түсініс­тікпен қарап, нақты реакция беру, үн қату деп ойлаймын. Және де бұл биліктің де, азаматтық қоғамның да жауапкершілігінің уақыт талабына сай артқанының белгісі дер едім. – Сіз саясаттанушы ретінде осы саяси талқылау басталған кезеңнен бергі уақытта оның қорытындысы қандай болады деген ойда жүр едіңіз? – Негізі, бүкіл мәселе, талап етіл­­­ген конс­­титуциялық өзгерістер тура­­лы әңгіме билік өкілетіктерінің тиіс­ті тар­мақтарына қатысты бол­ды емес пе?! Қалған баптары бұрынғы Қазақстан Республикасы Конституциясының 1995 жылғы референдумда қабыл­данған күйінде қалмақ деген сөз. Талқылау кезінде елдің назары «әркім» деген сөзге ауып, оның көлеңкесінде шетелдіктерге деген ойдың астасқаны рас. Жер және басқа да мәселелерге түпкі­лікті экономикалық мәселе шешіл­мей барудың ерте екендігі де бұған дейін сан рет айтылды. Мора­торий қойылды. Сол себепті де, халық­тың ішінде, қоғамдық ортада осы­дан соң да билік сол бұрынғы әңгі­ме­сін қайтадан бастап кете ме деген қорқыныштың болғаны да ақиқат. Президенттің кешегі Жұмыс тобымен болған басқосуында мұның барлығына нақты жауап берілді деп ойлаймын. Ендігі жерде барлық мәсе­ле биліктің өкілеттіктеріне және оның басқа да салалас тармақтарына қатысты болады. – Әңгімеңізге рахмет. Әңгімелескен Талғат СҮЙІНБАЙ, «Егемен Қазақстан» АЛМАТЫ