Фото: astanasottary
Сот материалдарына сәйкес, оқиға 2 сәуірде сағат 12:47 шамасында Әл-Фараби көшесінде тіркелген. Жүргізуші Ұлы дала көшесінен Ф. Оңғарсынова көшесіне бағыт алған тұста жаяу жүргіншілер өткелі арқылы өтіп бара жатып, жол қозғалысы ережелерін өрескел бұзған.
Сот анықтағандай, жүргізушінің әрекеті көпшілікке ашық түрде демонстративті агрессивті сипат алған. Ол жол қозғалысы ережелерін өрескел бұзып қана қоймай, жаяу жүргіншілер мен өзге де жол қозғалысына қатысушылардың өмірі мен денсаулығына нақты қауіп төндірген.
Сот отырысында Л. өз кінәсін толық мойындап, өкініш білдірді. Ол асығыс болғанын айтып, көлікті жоғары жылдамдықпен басқарғанын білсе де, жол бос деп ойлағанын түсіндірді.
Іс материалдарымен құқық бұзушылық толық дәлелденді. Оған Л.-ның түсініктемесі, әкімшілік құқық бұзушылық хаттамасы, инспектор рапорты және «Сергек» жүйесінің бейнежазбасы негіз болды.
Қолданыстағы заңнамаға сәйкес, мемлекеттік тәртіпті бұзғаны үшін 20 АЕК айыппұл немесе 20-60 сағат қоғамдық жұмыс яки 5-15 тәулік әкімшілік қамау қарастырылған.
Сот үкімімен Л. бұзақылық жасағаны үшін кінәлі деп танылып, оған 15 тәулік әкімшілік қамау жазасы тағайындалды.
Түркістанда полицейлер жол ережесін бұзған 700-ден астам жүргізушіні анықтады
Жаза тағайындау кезінде сот құқық бұзушылықтың сипаты мен қоғамдық қауіптілігін ескерді. Атап айтқанда, жүргізушінің қала орталығында, күндізгі уақытта, бағдаршамның тыйым салынған сигналына бағынбай, жоғары жылдамдықпен жүруі жолдағы қауіп-қатерді едәуір арттырғаны назарға алынды. Сондай-ақ, Л.-ның осы жылдың басынан бері жылдамдықты асыру бойынша 59 реттен астам әкімшілік жауапкершілікке тартылғаны ескерілді.
Сот мұндай жаза оның түзелуіне және қайталанатын құқық бұзушылықтардың алдын алуға ықпал етеді деп есептеді.
Сот қаулысы заңды күшіне енген жоқ.
Астаналық полицейлер бейнекамера арқылы жол ережесін бұзғандарды анықтады
