Аймақ басшысы конституциялық реформаның маңыздылығына тоқталып, жалпыхалықтық референдумның ел болашағы үшін айрықша мәнге ие екенін атап өтті.
«Конституциялық реформа жөніндегі жалпыхалықтық талқылаулар жарты жылға жуық уақыт әртүрлі алаңдарда өтті. Бұл – қоғамның саяси белсенділігі мен азаматтық жауапкершілігінің айқын көрінісі. Ел тағдырына қатысты маңызды шешімдерді халықтың тікелей дауыс беруіне ұсыну – демократияның шынайы әрі мызғымас қағидаты. Жаңа Конституция жобасында мемлекетіміздің іргелі негіздері, басты құндылықтары мен дүниетанымдық ұстанымдары жүйеленіп, заманауи талаптарға сай жаңғыртылды. Жалпыхалықтық референдум Тәуелсіз Қазақстанның алдағы даму кезеңін айқындап, ел тарихында жаңа белестің басталуына негіз болады деп сенеміз. Президентіміздің бастамасымен елімізде кейінгі жылдары қолға алынған саяси реформаларды жүзеге асыруда Сыр өңірі береке-бірліктің, тату тірліктің үлгісін көрсетіп келеді. Ұлтымыздың тарихына алтын әріппен жазылатын алдағы маңызды саяси кезеңде Сыр жұртшылығы еліміздің шынайы патриоты ретінде азаматтық ұстанымдарын білдіріп, жаңа Конституцияның жобасын қолдайды деп сенеміз. Баршаңызды осы іске жоғары жауапкершілікпен белсенді атсалысуға шақырамын», деді облыс әкімі.
Жиында Конституциялық реформаның құқықтық негіздері, «Заң мен тәртіп» қағидатының үстемдігі бағытында облыс прокуроры Ризабек Ожаров баяндама жасады. Қазақстанның еңбек сіңірген қайраткері, саяси ғылымдар докторы, профессор, Қазақстан Республикасы Сенаторлар кеңесінің мүшесі Мұрат Бақтиярұлы Конституцияның жаңа жобасы жайлы пікір білдіріп, кейбір мәселелерге тоқтала кетті.
«Ел ішінде жүргесін «Неге Конституцияны өзгерте береді?» деген сауалды құлағымыз шалып қалып жатыр. Заман өзгеріп, қоғамның сұранысы жаңа сатыға көтерілген сайын осындай өзгерістердің болып тұратыны – заңдылық. Мысалы, Франция мемлекеті қазіргі Конституциясын 1958 жылы қабылдаған. Осы жылдар ішінде оған 24 мәрте өзгеріс енгізіліпті. Ресейде, Орта Азиядағы бұрынғы одақ құрамындағы мемлекеттер де осы жолдан өтті», дейді ол.
Қайраткер сөз түйінінде жаңа Конституция жобасының маңызды бағыттарының бірі мемлекеттің әлеуметтік жауапкершілігін күшейту екенін еске салды.
Кездесуде Қорқыт ата атындағы Қорқыт ата университетінің басқарма төрағасы-ректоры Наурызбай Байқадамов «Әділетті және прогрессивті Қазақстанның халықтық конституциясы үшін» жалпыұлттық коалициясының үгіт-насихат жұмыстары жайлы айтты. Еңбек ұжымдарымен, тұрғындармен кездесулерде Конституция жобасы жайлы әр сала мамандары түсіндірме жасайды.
Жиында білім саласының ардагері Райкүл Байназарова Ата заң жобасындағы ғылым, инновация, мәдениет, облыстағы ҮЕҰ Альянсы төрағасы Анар Ізден азаматтар бостандығы мен құқығы, ал «Анаға тағзым» орталығының директоры Алтынай Молжанова отбасы және неке құндылығы жөнінде пайымды пікір білдірді.
Қызылорда
