Бұл туралы Президенттің баспасөз хатшысы Берік Уәли өзінің Facebook парақшасында мәлім етті.
"Италия және Чили елдерімен бірлесе отырып, Біріккен Ұлттар Ұйымы, Ұлыбритания және Франция ұйымдастырған бұл іс-шара видео конференция форматында өтеді. Виртуалды саммитке Қасым-Жомарт Тоқаевтан бөлек 75 мемлекеттің Президенттері мен Үкімет басшылары, халықаралық ұйымдардың, бизнес құрылымдарының жетекшілері, қоғамдық және академиялық топтардың өкілдері қатысады", дейді Берік Уәли.
Сондай-ақ баспасөз хатшысы жиынға қатысушы елдер Париж келісімінің негізгі үш компоненті аясында жаңа әрі аса маңызды міндеттерді жариялайтынын айтты.
Атап айтқанда коронавирус індетінен кейінгі кезеңде экологиялық және тұрақты қалыпқа келу мәселелерін қамтамасыз етуге бағытталған климаттың өзгеруі салдарын жеңілдету, оларға бейімделу және қаржыландыру.
"Мемлекет басшысы өзінің бейне үндеуінде климаттың өзгеруіне қарсы күресте еліміздің қолданып жатқан негізгі әдістері жөнінде айтып, Париж келісімінде бекітілген мақсаттар мен міндеттерге бейілдігін нақтылайды деп жоспарлануда", дейді Берік Уәли.
Іс-шараның тікелей трансляциясын мына сілтеме арқылы көруге болады: https://www.climateambitionsummit2020.org/index.php
