Франциядағы қазақстандықтардың негізгі санаттары – жоғары оқу орындардың студенттері (171), соның ішінде «Болашақ» және «Абай-Верн» бағдарламаларымен және жеке бастамамен оқып жүргендер, француз компаниялары мен халықаралық ұйымдардың қызметкерлері, жергілікті азаматтар жанұяларының мүшелері. Париждан бөлек отандастарымыз Лион, Страсбург, Гренобль, Монпелье, Лилль және т.б. қалаларда тұрады.
Екі мемлекет арасындағы тікелей әуе қатынасы тоқтатылғаннан бері (6 наурыздан бастап) Елшілік Қазақстанға, негізінен «Белавиа» және «Аэрофлот» компанияларының рейстерімен, 50-ден астам отандасымыздың және басқа да елдерден транзитпен келе жатқан бірқатар қазақстандықтардың елге оралуына жәрдемдесті.
Франция үкіметі 12 наурызда тұрғындардың жүруіне қатал шектеулерді енгізгенінен кейін Елшілік отандастардың сұрақтарына дер кезінде жауап беру мақсатында тәулік бойы істейтін «жедел желі» ашып, әлеуметтік желілерде ақпараттық және түсіндірме жұмысын күшейтті.
Отанға оралу немесе Франциядағы қазіргі тұрып жатқан орнында оқшаулану туралы шешімді әрбір қазақстандық жеке өзі қабылдайды. Дегенмен, дипломаттар жеке тәуекелдерін салыстыруға шақырады. Елге қайту жөнінде шешім қабылданған жағдайда дипломаттар шұғыл өзгеріп жатқан ахуалға бейімделген мүмкіндіктерін іздестіруде көмек көрсетуде.
Елшілік қызметкерлері Франциядағы отандастар «санағын» жүргізуін жалғастырып, оларда туындап жатқан мәселелерді зерделеуде. Осы орайда аталған мемлекетте уақытша немесе тұрғылықты тұрып жатқан барлық Қазақстан азаматтарын консулдық есепке тұруға шақырамыз. Бұл халықаралық қағида бірінші кезекте төтенше жағдайларда қауіпсіздік шараларын қамтамасыз етуге бағытталған.
