Форумды ұйымдастырушылардың қатарында Шәкәрім университеті, Польшаның Лешно қаласындағы Ян Амос Коменский атындағы мемлекеттік жоғары кәсіби білім мектебі, Оңтүстік Кореяның Кьюнгдонг университеті, Қытайдың Шенжэн университеті, Иорданиядан Бүкіләлемдік ислам ғылым академиясы және Швейцарияның экономика мен менеджментке арналған қолданбалы ғылыми жоғары мектебі бар.
– Өркениетті мәдениеттердің басын біріктіру, халықтар арасындағы өзара түсіністікті дамыту осының барлығы форумның негізгі мақсаты, – деді Шәкәрім атындағы мемлекеттік университеттің ректоры Мейір Ескендіров, – дуалды білім беру жүйесінің отандық және халықаралық тәжірибесін дамыту, төртінші өнеркәсіптік революция жағдайында қос дипломды білімнің маңыздылығын арттыру бүгінгі өзекті мәселелер.
Форумның құрметті төрағасы болып мемлекет және қоғам қайраткері, Қазақстан Республикасы Президенті Кеңсесінің бастығы, саясаттанушы, саясаттану ғылымдарының докторы, профессор, Тұңғыш Президент – Елбасы кітапханасының басшысы Махмұд Қасымбеков сайланды.
Ректор құрметті төраға Махмұд Қасымбековтің форумға қатысушыларға арнаған үндеуімен таныстырды. Онда Қазақстанның әлемдік интеграциядан алатын өзіндік орны аса өзекті мәселе екендігі және халықтар достығы мен ынтымағы, сол сияқты білім саласындағы жаңашылдық бастамалары болашақта бүкіл адамзатты бейбіт өмірге жетелейтіндігі туралы айтылған.
Шара барысында пленарлық отырыс және ғылыми-тәжірибелік алаң өткізілді. Шәкәрім университеті аясында «Польша-Қазақстан мәдени орталығы» ашылды. «Акме» ағарту клубы да өз мәжілісін өткізіп, «Сыбайлас жемқорлықпен күрес: халықаралық тәжірибе және әріптестік» тақырыбымен дөңгелек үстел ұйымдастырды. Сондай-ақ қонақтар «Жидебай» этнофестивалін тамашалады.
Форумда басты спикерлер ретінде Кьюнгдонг университетінің ректоры, профессор Джон Ли, Шэнжен университетінің ректоры, профессор Тао Йитао, Польша елінен Ян Амос Коменский жоғары мектебінің ректоры, профессор Мачей Петшак, Швейцария елінің экономика және менеджмент бойынша қолданбалы жоғары мектебінен ректор, профессор Доминик Джордан сөз сөйледі.
Осындай жоғары деңгейде форум өткізу Елбасының білім саласын дамытудағы тың бастамаларының бірі, экономикалық және рухани, саяси бағыттағы ұсынып отырған басты тапсырмасы, деді шараға жиналғандар. Форум басқармасының мүшелері «Білім беру – әлемге» атты хартияға қол қойды. Олар енді әлемдегі рухани бастамалардың жаңғыруына үлес қоспақ.
Раушан НҰҒМАНБЕК,
журналист
СЕМЕЙ
