Ш.Айманов атындағы «Қазақфильм» киностудиясының «Дебют» шығармашылық-өндірістік бірлестігі қысқаметражды көркем фильмдердің сценарийлерін қарастыру үшін байқау жариялады. Бұл туралы киностудияның баспасөз қызметі мәлімдеді.
Шарт бойынша, байқауға Қазақстан Республикасының азаматтары ғана қатыса алады.
«Сценарий көлемі 5-20 бет болуы керек. Мәтін қазақ немесе орыс тілдерінде қабылданады. Сондай-ақ кинематография саласында бұрын жасаған режиссерлік жобалары, тәжірибесі болса құба-құп» делінген баспасөз баянында.
Сценарий мазмұнында конституциялық құрылымды күштеп өзгертуді үгіттеу немесе насихаттау; Республиканың тұтастығын бұзу; мемлекет қауіпсіздігіне зиянкестік жасау; әлеуметтік, нәсілдік, ұлттық, діни, тектік және рулық үстемдікті, қатыгездік пен зорлық-зомбылықты үгіттеу немесе насихаттау көріністері, сонымен қатар порнографиялық және арнаулы сексуалдық-эротикалық сипаттағы көрініс сахналар болмауы тиіс.
Сценарийлер 2017 жылдың 1 мамырына дейін қабылданады. «Дебют» ШӨБ қабылданған сценарийлердің өндіріске жіберілуіне кепілдік бермейді.
Ш. Айманов атындағы «Қазақфильм» АҚ – Көркем, деректі, анимациялық кино өндірісі мен өндірістен кейінгі кезеңде тұрған өнімдермен (оның ішінде монтаждау, дыбыстау, т.б.) айналысатын Қазақстандағы негізгі кинокомпания. Ш.Айманов атындағы «Қазақфильм» киностудиясының тарихы 1934 жылдан бастау алады.
