Кибер килігуден қорғайды

Әлемге танымал «Касперский зертханасы» компаниясымен серіктестік аясында әл-Фараби атындағы ҚазҰУ-де «Ақпараттық қауіпсіздік» орталығы ашылды. Білім ордасындағы бұл оқу орталығы ақпараттық қауіпсіздік саласындағы кибер-қауіп пен заманауи тренд туралы білімнің қайнар көзі болмақ. Сондай-ақ, ресурстарды жаһандық ғаламтор кеңістігіндегі кибер-шабуылдардан қорғаудың құрылымдық жүйесін құру жұмыстары да қолға алынбақ. Аталған орталықта жоғары оқу орындарының студенттерімен қатар, мемлекеттік мекемелер мен кәсіпорындардың қызметкерлері де білімін жетілдіре алады. «Касперский зертханасы» білім беру бағдарламасының жетекшісі Дмитрий Постель­никтің айтуынша, «Касперский зертханасының» жұмысы ақпа­раттық қауіп пен кибер қауіпсіздік туралы білім сапасын арттыруға бағыт­талған. Компания өнім­дері сертификатталған және ха­лық­аралық нарыққа шыға­рылған. Білім беру саласы ар­қылы өз тәжірибемізбен бөлі­суге және кибер-қорғаныс бо­йынша қазақстандық еңбек нарығындағы мамандар әлеуетін жоғары мамандандырылған қызметкерлермен толық қамта­масыз етуге мүмкіндік бар. Бүгінде ғаламдық ақпа­раттандыру қоғамға үлкен өз­ге­рістер енгізуде. Мамандар ақпарат­тық технология саласын­дағы қауіп-қатердің алдын алу мақсатында заманға сай әрі озық технологиялар ұсынуда. Кибер-қауіпсіздік және білім беру саласы бойынша ресейлік зертханамен ынтымақтастық туралы келісім аясында Мәскеудегі «Касперский зертханасының» ең үздік сарапшылары ақпан айын­да Алматыға арнайы келіп, оқу орнының оқытушылары мен студенттеріне, сондай-ақ мем­лекеттік мекемелер мен ком­паниялардың өкілдеріне арналған семинарлар жүргізіп, дәрістер оқымақ. Айта кетерлігі, әл-Фараби атындағы ҚазҰУ цифрлы технологияларды қолдана отырып, білім беру мен ғылыми-зерттеу жұмыстарын белсенді түрде жүргізіп келеді. Білім ордасында әйгілі «Hewlett-Packard», «Microsoft», «Cisco», «Konika Minolta», «Fujitsu», «Sam­sung» және басқа да бір­қатар компаниялардың орталықтары мен зертханалары ашылып, жемісті жұмыс істеп келе жат­қандығы соның айғағы. Мира БАЙБЕК, «Егемен Қазақстан» АЛМАТЫ