Соңғы қоңырау қарсаңында BilimClass платформасы мұғалімдерге арналған ерекше онлайн акцияны іске қосты. Енді оқушылар мен ата-аналар ұстаздарына виртуалды гүл шоқтарын жолдап, алғыс білдіре алады, деп хабарлайды Egemen.kz.
Платформа өкілдерінің айтуынша, бұл бастама жыл бойы шәкірттерге білім беріп, қолдау көрсеткен мұғалімдердің еңбегін бағалауға бағытталған.
Виртуалды гүл жіберу үшін пайдаланушылар BilimClass жүйесіндегі арнайы гүл белгішесін басып, қажетті мұғалімді таңдап, тілегін жазып жібере алады.
«Енді әрбір оқушы ұстазын жылдам әрі шығынсыз құттықтай алады. Гүл шоғын сыйлау үшін оқушылар мен ата-аналар BilimClass платформасындағы гүл белгішесін басып, мұғалімдерді таңдап, оларға жүрекжарды тілегін жазып жібере алады. Науқан 26 мамырға дейін жалғасады. Ол күні мұғалімдер барлық гүл шоқтарын алып, оқушыларынан келген хаттарды оқи алады», дейді BilimClass өнім жетекшісі Фархат Үсен.
Қазір платформаны Қазақстанның 13 өңірінде 2,2 миллион оқушы және 300 мыңнан астам мұғалім пайдаланып келеді.
Енді мұғалім оқушыға тек сабақ кезінде жауапты: Мәжіліс жаңа заңды мақұлдады
Жобаны цифрлық білім беру технологиялары саласында 15 жылдан астам тәжірибесі бар Bilim Group әзірлеген. Компания экожүйесіне OnlineMektep, BilimLand, BilimKids, Kitap.kz және басқа да сервистер кіреді.
Айта кетейік, Қазақстан бойынша биыл 215 мыңнан астам оқушы мектеп бітіреді.