Қаланың бірнеше ауданында тұрғындар көшеге шығып, электр энергиясын қалпына келтіруді және азық-түлікпен қамтамасыз етуді талап етті. Наразылық акциялары Куба астанасының әртүрлі бөліктерінде тіркелген бұрынғы шерулермен ұласты. Сан-Мигель-дель-Падрон муниципалитетінде халық үкімет ғимараты алдына жиналып, электр жарығы мен азық-түлікті талап етіп ұрандатқан.
Шерулер соңғы жылдардағы ең ауыр энергетикалық дағдарыстардың салдарынан туындаған. Елдегі электр энергиясының тапшылығы кешкі уақытта шамамен 2000 мегаваттқа жеткен. Тұрғындардың айтуынша, аптап ыстық пен ұзаққа созылған жарық өшуі салдарынан азық-түлік бұзылып, өмір сүру жағдайы қиындаған.
Жағдайға АҚШ-тың Кубаға қарсы енгізген блокадасы әсер етіп отыр. Бұл шектеулер жанармай жеткізуге кедергі келтірген. Билік мәліметінше, 2025 жылдың желтоқсанынан 2026 жылдың наурызына дейін Куба мұнай жеткізілімдерін мүлде алмаған.
«Бізде қазір мүлде мазут та, дизель отыны да жоқ. Қолымызда бары – өз кен орындарымыздан өндірілетін ілеспе газ бен ұлттық мұнай ғана. Оның өндірісі де артып келеді», деді Кубаның энергетика және тау-кен өнеркәсібі министрі Висенте де ла О Леви.
Кубадағы дағдарыс: 3 ай бойы мұнайсыз қалған елде электр энергиясы толығымен өшті
Оның айтуынша, қазір энергия жүйесі тек ұлттық мұнай, табиғи газ және жаңартылатын энергия көздері есебінен жұмыс істеп тұр.
Соңғы екі жылда Кубада шамамен 1300 мегаватт күн энергиясы қуаты іске қосылғанымен, жанармай тапшылығына байланысты электр желілерінің тұрақсыздығы бұл әлеуетті толық пайдалануға мүмкіндік бермей отыр.
Бұған дейін БҰҰ АҚШ шектеулерін заңсыз деп атап, олардың азық-түлік, денсаулық сақтау және басқа да қызметтерге қол жеткізу құқығын бұзатынын мәлімдеген.
Айта кетейік, бұған дейін Куба президенті Мигель Диас-Канель X әлеуметтік желісіндегі парақшасында Трамппен соғысуға дайын екенін жеткізген болатын.
