Аорталық стеноз – егде жаста жиі кездесетін әрі өмірге қауіпті дерттің бірі. Бұл ауру уақытында емделмесе, жүрек жеткіліксіздігіне әкеліп, науқастың өмірін қысқартады. 90 жастан асқан адамға дәстүрлі ашық операция жасау өте қауіпті. Осыны ескерген дәрігерлер науқасқа ең қауіпсіз әрі тиімді әдісті – аз инвазивті TAVI технологиясын таңдады.
Бұл әдіс кезінде жаңа қақпақша сан артериясы арқылы енгізілген жұқа катетердің көмегімен жүрекке жеткізіледі. Яғни кеуде сүйегі кесілмейді, жасанды қан айналымы аппараты қолданылмайды. Мұндай тәсіл, әсіресе, жасы үлкен науқасқа аса маңызды.
Дәрігерлер TAVI әдісінің негізгі артықшылығын атап өтті. Біріншіден, ол ағзаға түсетін жүктеменің аз болуына, тез қалпына келуіне, ауруханада жату мерзімінің қысқаруына, сондай-ақ операциялық тәуекелі жоғары науқастың дертінен айығуына мүмкіндік береді. Ангиохирург Арман Садықов: «Науқастың жасы – үлкен қауіп факторы. Соған қарамастан, қазіргі медицинаның мүмкіндіктері осындай күрделі жағдайда да тиімді көмек көрсетуге жол ашып отыр. TAVI – ауыр операциясыз өмір сүруге берілген мүмкіндік», дейді.
Басқарушы компанияның бас директоры Жұмағали Исмаилов пациенттің жасына қарамай, барлығына сапалы әрі қауіпсіз медициналық көмек қолжетімді екенін тілге тиек ете келіп, 2023 жылы 97 жастағы қарияға, одан кейін 103 жастағы кейуанаға сәтті операция жасалғанын айрықша атап өтті.
«Жүзге таяған анамызға осындай операция жасау мүмкіндігі барын білмеген едік. Дәрігерлерге кәсібилігі мен жанашырлығына, асыл анамыздың өмірін ұзартқанына шын жүректен алғыс айтамыз», деген кейуананың туыстары да дәрігерлерге ризашылығын білдірді.
Бүгінде TAVI – жүрек қақпақшасы ауруларын емдеудегі ең заманауи әрі тиімді әдістердің бірі. Егде жастағы науқастардың өмір сапасын жақсартуға жәрдемдесетін медицинадағы тың тәсіл.
Алматы облысы
