Бұл көрме – жай ғана суреттер жиынтығы емес, қазақ көшпелі өркениетіндегі әйел бейнесін зерттеуге арналған көркемдік жоба. Автордың объективіне ілінген дүниелерден ұлттық киімнің, шексіз даланың, ата-бабалар рухының біртұтас эстетикалық кодқа айналғанын байқауға болады. Әрбір портретті көрнекі жырға айналдырып, қазақ ұлттық киімдерінің терең сұлулығын әйгілейді.
«Әр суретті адамдардың бойында қазақ мәдениетіне қатысты жарқын естелік қалса деген тілекпен түсіремін. «Киіз үй» деген жоба бастап, кейінгі төрт жылда ұлттық салт-дәстүрімізді әйгілейтін қаншама жанды фотосурет дүниеге әкелдім. Тұтынушылар арасында өзге ұлттың адамдары баршылық. Олар бұл арқылы ұлттық киіміміздің эстетикалық ерекшелігін тереңірек түсініп, елімізге деген сүйіспеншілігін білдіріп жатады. Әшекейлерді көбірек қолданамын. Сонау АҚШ-тан, Еуропа елдерінен келіп, арнайы түсіп кеткендер қаншама», дейді Айгүл Төлегенова.
Автор этностильді жаңаша пайымдап, қазақтың ұлттық киімін музей экспонаты ретінде ғана емес, бүгінгі күннің сәніне сай жанды, өзекті мәдениет ретінде көрсетеді. Бұл – қазіргі жастарды өз тамырынан ажырамауға, ұлттық жәдігерлерді мақтан тұтуға шақыратын ерекше үндеу. Халқымыздың қоңыр тіршілігіне жақын түстердің қанықтылығы мен бейнелердің шынайылығы қазақы болмысқа жетелейді.
Айта кетейік, Айгүлдің фотосуреттері елімізбен қатар, Ресейде, Франциядағы көрмелерде ұсынылған.
Павлодар облысы
