Фото: Ашық дереккөз
Жетісу облыстық полиция департаментінің мәлімдеуінше, қажетті тергеу әрекеттері жүргізіліп жатыр. Бірқатар сот сараптамалары, соның ішінде сот-психиатриялық сараптама тағайындалған. Процессуалдық шешім сараптама нәтижелері алынғаннан кейін және тергеу әрекеттері аяқталған соң қабылданады.
Туған баласына зорлық көрсеткен әйел тұрмыста және күйеуімен бірге екі ұлды тәрбиелеп отыр. Балалардың біреуі – 4 жаста, екіншісі – 2,5 жаста. Әлеуметтік желілерде тараған видеода әйелдің 4 жастағы ұлын ұрып жатқан сәті көрініс тапқан. Әйел танысының үйінде қонақта болған. Ұлын суды өшіруді ұмытып кеткені үшін аяусыз сабаған.
Сондай-ақ балалардың әкесіне қатысты да қылмыстық іс қозғалғаны белгілі болды. Оған кәмелетке толмаған баланы тәрбиелеу міндеттерін орындамау айыбы тағылып отыр. Заңнамаға сәйкес, ер адамға ірі көлемде айыппұл салу, қоғамдық жұмыстарға тарту, немесе 3 жылға дейін бас бостандығын шектеу немесе айыру жазасы қолданылуы мүмкін.
Қазір екі бала Талдықорған қаласындағы балалар мекемелерінің бірінде тәрбиешілер мен дәрігерлердің бақылауында. Билік органдары әйелді ата-ана құқығынан айыру мәселесін қарастырып жатыр.
