Депутат заң жобасында пайдалы бастамалар бар екенін айтқанымен, азаматтарды мазалайтын автоқоңырау мәселесі әлі шешілмегенін сынға алды. Оның сөзінше, бұл мәселе комитет отырыстарында да көтерілген, алайда министрлік автоматты қоңырауларға тыйым салу туралы норманы қолдамаған.
Сондай-ақ Асхат Аймағамбетов байланыс операторлары шетелдік нөмірлер арқылы жасалатын алаяқтық шабуылдарға қарсы қандай техникалық шаралар қабылдап жатқанын сұрады.
Бұдан бөлек, депутат мобильді операторлардың ортақ инфрақұрылымды пайдалану тәжірибесін енгізуді ұсынды. Оның пікірінше, Еуропа мен АҚШ-тағыдай байланыс операторлары жеке-жеке кабель тартпай, ортақ желілерді қолданса, бұл бәсекені арттырып, тарифтердің арзандауына әсер етуі мүмкін.
Өз кезегінде Жаслан Мәдиев автоматты қоңыраулар мәселесі әлі де талқыланатынын айтты. Министр қазіргі таңда нарықта үш ірі мобильді оператор жұмыс істейтінін және жаңа ойыншылардың келуі нарықтың табыстылығына байланысты екенін жеткізді.
Оның айтуынша, егер байланыс нарығы тартымды әрі тиімді болса, онда жаңа операторлардың пайда болуына мүмкіндік туады.
Сонымен қатар елде телефон алаяқтарына қарсы жаңа шектеулер енгізу жоспарланып отыр.
Смартфоныңызды бөгде адамға беруге болмайды: Қазақстанда жаңа тыйым енгізілмек
Айта кетейік, Мәжіліс педагог мәртебесі, білім беру, денсаулық сақтау және бала құқықтарын қорғау мәселелеріне қатысты заң жобасын мақұлдады.
