Бұл туралы қоғамдық тыңдаулар барысында «Алматыбасжоспар» ғылыми-зерттеу институтының басшысы Асхат Садуов мәлімдеді.
Оның айтуынша, қолданыстағы «қызыл» метро желісін ұзарту жоспарланып отыр. Атап айтқанда, «Қалқаман» станциясын ашып, одан әрі «Барлық» базарына дейін тағы үш станция салу көзделген.
Сондай-ақ «жасыл» метро желісін болашақта Алатау қаласымен байланыстыру мүмкіндігі қарастырылып жатыр. Бұл қала маңында тұратын тұрғындарға қоғамдық көлікке ыңғайлы ауысуға жол ашады.
Бұдан бөлек, жолаушылар ағынын теңестіру және қаланың полицентрлік дамуын қамтамасыз ету мақсатында желіні «Қазақфильм» ауданына дейін ұзарту нұсқасы да талқылануда. Жоспарда әуежай аумағында метро станциясын салу мүмкіндігі де бар.
Алматыда LRT жобасын іске қосу мәселесі де бас жоспар аясында қарастырылған. Асхат Садуовтың мәліметінше, «Барлық» станциясынан бастап бұрын Төле би көшесімен өткен трамвай дәлізін қайта жандандыру жоспарланып отыр. LRT желісі Бауыржан Момышұлы көшесі арқылы депоға дейін жетіп, «қызғылт сары» бағыт «Қазақфильмге» дейін созылады. Сонымен қатар Жароков көшесі арқылы Төле би және Абай даңғылдарымен байланыс орнату көзделген.
Институт басшысы жақын уақытта LRT-ның алғашқы желісі бойынша техникалық-экономикалық негіздеме (ТЭН) әзірлеу жоспарланып отырғанын айтты.
Жоспарланған жобалар Алматыдағы көлік жүктемесін азайтып, қала мен қала маңындағы аудандар арасындағы қатынасты жақсартуға бағытталған.
