ЕР БАУКЕҢНІҢ ҚЫЗЫ ЕЛЕНА АТАМЕКЕНІНЕ КЕЛІП, ӘРУАҚТАР РУХЫНА ЗИЯРАТ ЕТТІ

Жазылған жайдың жаңғырығы 2005 жылғы ақпанда “Егемен Қазақстан” газетіне “Ер Баукеңнің қызы Елена” деген кө­лемді мақала жарияла­ған­быз. Тың дерек бол­ғандықтан болар, оны қалың көпшілік іздеп жүріп оқыды, тіпті “ас­ыл­дың сынығы табыл­ды” деп бір-бірінен сүй­інші сұрап, қауқыл­дас­қан қарияларға да куә болғанбыз. Батырдың қы­зын елге шақыру кі­сілік екенін айтып, сол кездегі облыс бас­шы­лығына мақала авторы ретінде хат та жаз­­ған­быз. Көп ұзамай Елена Бауыржанқызы Кор­кина Алатаудың бөкте­ріндегі Алматыға келіп, бауыры Бақытжанмен кездесті. Әке қабіріне зиярат етті.Бірақ уақыттың тығыздығынан болар, әкесінің кіндік қаны тамған қасиетті Жуалы өңіріне жолы түспеді. “Сабыр түбі сары алтын”. Жа­қында Елена әпкеміз қасиетті Та­раз-Әулиета-Жамбыл жеріне келіп, батыр Баукең туған Жуалы ауда­нын­дағы Момыш бұлағының ба­сына барып зиярат етті. Батырдың туғанына 90 жыл толу құрметіне орай осыдан он жыл бұрын Серік Үм­бетовтің қолдауымен тұрғызыл­ған, бүгінде Тараз қаласының тө­рінде өрлік пен ерліктің символына айналып тұрған батыр ескерткішіне қос бауыр Бақытжан мен Елена гүл шоқтарын қойып, әке рухына бас иді. Еленаның жүрегінде әкесі Мәс­кеуге келген сайын құлағына құя­тын “Айналайын” деген қазақтың алтынға пара-пар сөзі мәңгілікке қалып қойған. Одан кейін Момыш­ұлы отбасы мұзарттарының бірі - “Музей апаның” суреті көз алды­нан кетпейді. Әлбетте, “Бақытжан бауырым мен асқар шыңды Ала­тауды бір көрсем” деген арман да көзіне жас алдыратын. Әкесі айт­пақшы, айналайын, қазақ елінің кең жүрегі мен бауырмал туыс­қандар пейілінің арқасында, міне, сол арман да орындалды. Қараңыздаршы, бірі Мәскеуде, екіншісі Алматыда тұратын қос бауырдың қатар жүргені қандай жарасымды! Көсемәлі СӘТТІБАЙҰЛЫ, Жамбыл облысы. Суретте: Баукеңнің көп жылдан кейін табысқан ұрпақтары Бақыт­жан мен Елена Тараз қаласының төрінде.