Қыз баланың бойындағы өзгерісті байқаған мектеп мұғалімдері оқушы жайында психолог пен жасөспірімдер жөніндегі уәкілге хабарлаған екен. Жеке әңгімелесу кезінде 8 класс оқушысы өзін өгей әкесінің жыныстық қатынасқа түсуге мәжбүрлегенін айтқан. Дәрігердің тексеруінен кейін қыздың жүкті екені анықталған.
Оқиға бойынша Алакөл ауданының полициясы қылмыстық іс қозғап, күдіктіні тергеуге алған екен. Тергеуден кейін өгей әкені ешқайда кетпеу туралы қолхат алып, үйіне жіберіпті. Істің насырға шапқанын түсінген зорлықшыл азамат сол күні өзіне қол салып, асылып өлген.
Қазір зорланған қыз анасымен бірге Талдықорған қаласына жеткізіліпті. Дәрігерлер мен психолог мамандар жәбірленушіні қамқорлыққа алып, қажетті көмектің барлығы жасалып отырған көрінеді.
