«Медеу» мүмкіндіктер берген еді...

«Медеу» «Медеу» болғалы қазақстандық спортшылар Уни­версиада сынды аламан жарысқа алғаш рет ат салысқанымен, рекорд жаңғырта алмады. Конькимен жүгіруші Екатерина Айдо­ваның екі мәрте алған қола медаліне малдандық. Барлығы 23 елден келген 170 конькишінің арасында, тіпті, біздің спортшыларымыз қалың шаңның арасынан көрінбей қалды. Өкінішті-ақ... Бүгін атақты мұз айдынында коньки жарысынан масс-старттан соңғы жарыстар өтті. Жүлдесізбіз... Біз биік таудағы «Медеу» спорт кешенінің универсиадалық ойындарға байланыс­ты бас менеджері Дулат КЕЙКИНДІ әңгімеге тартқан едік. – Дулат Жәрдемұлы, қазақ жерінде алғаш рет өткізіліп тұрған халықаралық қысқы жарыста «Медеу» спорт кеше­нінің жолы болмады ма, әлде спортшылардың асығы алшысынан түспей қойды ма? – Биік таудағы «Медеу» спорт кешенінің «Рекордтар ұстаханасы» деген аты бар. 1972 жылдан бері осы мұз айдынында 120 рет әлемдік рекорд жаңартылды. Оны Жер шары мойындаған, ендеше, бұған айдынның еш қатысы жоқ. Негізі, «Медеу» мүмкіндіктер берген еді... – Ол кездегі «Медеу» мен қазіргі «Медеуді» салыс­тыруға бола ма? – Әрине, болады. Мұз айдынына қашан да кешен жанындағы су қоймасынан мөлдіреген тау суы құйылып, мұз қатырылады. – Алатаудың мұздақ­тарынан түзілген ол судың спорт­қа қан­дай қатысы бар, спортшыға маңы­здысы қат­қан мұз емес пе? – Мұздақ суы кіршіксіз, тіпті, оның құрамында кәдімгі біз ішіп жүрген судың құрамындағы бірталай минералды қоспалар да жоқтың қасы. Мұндай мұзда спортшы да жұлдыздай ағады. Коньки мен мұз арасындағы үй­келіс мейлінше жеңілдейді. Мұны конькишілеріміз де жақсы біледі... – «Медеу» спорт кешені айдынының басты ерекшелігі осы ғой сонда? – Иә, басты ерекшелігі мұз­дың кристалдай тазалығында. Әрине, оның биік таудың қойнауында орналасқанының да себебі зор. – Ендеше, дүниежүзілік қыс­қы спорт сайысында «Ме­деуде» неге жерлестеріміз жүл­десіз қалды? – Рекордты спортшы жасайды, кешен – тіркейді. Жеңіс – спортшының қандай дайындықпен келгеніне байланысты. – Конькимен жарысушылар сайысы басталғанда, Ме­деу шатқалында жапа­лақтап қар жауды. Біздің спорт­­шыла­рымызға таби­ғаттың тосын осы құ­бы­лысы қатты әсер етті дегенге не айтар едіңіз? – Ширек ғасырдан астам уақыт осында жаттығатын спорт­шылармен жұмыс істедім, «Медеу» спорт кешенінде қыз­мет атқардым. Менің біле­тінім, керісінше, туған жердің киесі спортшыларды қолдайды деп жатады. – Дейтұрғанмен, тау шат­қалындағы төпелеп жауған қар қырсығын аз тигізбеген шығар? – Мен мұздату техноло­гиясының инженерімін. Бұл сұрағыңызға еліміздің конькимен сырғанаушылар құра­масының бас бапкері, атақты конькишіміз Людмила Про­кашеваның жауап қайтарғаны дұрыс деп ойлаймын. – Бас бапкер жапалақтап жауған қардың астында тұрып, қазақстандықтардың үкілі үмі­тіндей болған Екате­рина Айдо­ваға қатысты «Ауа райы неғұр­лым қолайсыз болса, бізге солғұрлым тиімді», деп еді. Біз куәміз... – Спорттың қуанышы мен өкініші қатар жүреді. Ең бастысы – әлемдік универсиада спортшыларына «Медеу» әдеттегідей жылы қабақ танытты. Давиде Джотто (Италия) мен Александра Качуркина (Ресей) алтын, Сейтаро Ичинохе мен Нана Такахаши күміс, Линус Хайтдеггер (Австрия) қола медальді еліне осы жер­ден алып кетті ғой. Бас жат­­тықтырушы айтқандай таби­ғат, яғни, «Медеу» біздің спорт­шы­ларымызға хал-қадерінше көмектесті... – Әңгімеңізге рахмет. Әңгімелескен Талғат СҮЙІНБАЙ, «Егемен Қазақстан» АЛМАТЫ