«Астана» ойыншысы итальян клубының назарына ілікті

«Астананың» жартылай қорғаушысы Неманья Максимовичке енді Италияның «Ювентусы» да көз тікті. Бұл туралы vesti.kz хабарлады. Tuttojuve.com ақпараты бойынша, бұл команда орталық жартылай қорғанысты күшейтуді жоспарлап отыр. Олар қазіргі сәтте қорғаныс пен шабуылды байланыстыратын ойыншыға зәру. Аталған сайт Максимовичті өзінің таланттылығымен, физикалық тұрғыдан мығымдылығымен және әмбебаптылығымен туриндіктердің назарына іліккенін хабарлады. Сербия ұлттық құрамасының футболшысы 3 миллион еуроға бағаланып отыр. Бір қызығы осыдан бір жарым жыл бұрын ол sports.kz сайтына берген сұхбатында дәл осы «бьянконерилердің» сапында өнер көрсету арманы екенін айтқан. Сондай-ақ, жақында «Ювентустың» бұрынғы футболшысы Зоран Миркович итальян ұжымына Максимовичке назар аударуды кеңес еткен. Бұдан бөлек, оған «Рома», «Интер», «Милан» командалары сербиялыққа қызығушылық танытып отыр. Айта кетейік, туриндік клуб осы қыста Ресейдің «Зенитінде» ойнаған Аксель Витсельді өз қатарларына қоспақ болған. Алайда, бельгиялық спортшы Қытайдан келіп түскен қомақты ұсынысты қабыл алып, италиялықтардың бұл жоспары жүзеге аспай қалған болатын.