Обырды диагностикалау мен емдеудің ең соңғы зерттеулері туралы сөз қозғалған жиынның бұл жолғы табысы – Қазақстан посткеңестік кеңістікте бірінші болып метастазалық колоректальды қатерлі ісікті науқастарда (мКРР) «сұйық биопсия» көмегімен RAS биомаркерлерін анықтаудың жаңа технологиясын енгізді. Бұл әдіс науқастардың жанына батпайды, ағзаға зақымы аз әрі нәтижесін ұзақ күтудің қажеті жоқ.
Сонымен, Съезд аясында Қазақ онкология және радиология ғылыми-зерттеу институты мен «Мерк» компаниясы Қазақстан Республикасының аумағында онкологиялық сырқатпен күресу саласында өзара түсіністік және ынтымақтастық туралы меморандумға қол қойды.
Осы арада 1668 жылы құрылған, бүгінде 50 мыңдай қызметкері бар «Мерк» әлемдегі ең байырғы химиялық-фармацевтикалық компаниялардың бірі болып табылатынын айта кету керек.
– Съезд барысында дертті барынша дер кезінде диагностикалау, ересектер мен балаларда онкологиялық сырқаттарды емдеу мәселелері қаралды. Инновациялық медициналық технологиялар, патоморфологиялық және молекулярлы-генетикалық зертханалардың мүмкіндіктері ұсынылды. Трансплантология, нейроонкология, психикалық-әлеуметтік көмектердің жай-жапсары талқыланды. Отандық ғылымның дамуына септесетін жас ғалымдардың тақырыптық секциялары өтті.
Съезге Италия, Испания, Түркия, Израиль, Ресей, Украина, Беларусь, Грузия, Әзербайжан, Польша, Чехия мен басқа да елдердің білікті мамандары шақырылды. Жиынға жетекші сарапшылардың шақырылуы тағдыршешті қорытындылар жасап, тиімді жаңалықтар ашуға мүмкіндік береді. Осы жиында берілген білім, бөлінген тәжірибенің дәрігерлеріміз үшін пайдасы үлкен. Біртіндеп еліміздің барлық өңірлерінде жоғары технологиялар енгізіле береді. Съезд жұмысы онкологиялық қызметті жақсартуға, осы саланың озық тәжірибелері мен инновациялық технологияларын елімізге әкелуге ықпал ететіне сенімдіміз, – деді Онкологтар қоғамдастығының президенті, Қазақ онкология және радиология ғылыми-зерттеу институтының директоры Диляра Қайдарқызы.
Съезд шеңберіндегі маңызды оқиғаға қайта оралатын болсақ, метастазалық колоректальдық обырға (МКРО) шалдыққан науқастардағы биомаркерлердің жеке мәртебесін түсіну – кейін емдеу тәсілін таңдауда, дер кезінде шешімдер қабылдауда аса маңызды. Бұл науқастың өмірін барынша ұзартады.
Сонымен бағасы 50 мың долларды құрайтын жаңа медициналық құрылғы Алматыдағы Қазақ онкология және радиология ғылыми-зеттеу институтында орнатылды. Біздің мамандар бір ай бойы онымен жұмыс істеуді үйренбек.
– Сұйық биопсия – бұл онкологиялық аурулармен күресу жолындағы жаңа термин. Дертті ерте бастан және сипатын дәл анықтау емнің сапалы болуына, қатерлі ісікті асқындырмауға әсер ететіні ешкімге құпия емес. Медициналық сараптамалардың дәлдігін арттыра отырып, біз науқастардың жағдайын жақсартамыз. Дәстүрлі диагностикалаумен байланысты ауырсыну сезімдерін, сараптама нәтижесін сарсылып күту мерзімін азайтамыз. RAS маркерлерін молекулярлық диагностикалаудың инновациялық әдісі кешегі кеңестік аумақта бірінші болып Қазақстанда енгізіліп отыр. Қазірге Ресейдің «сұйық биопсия» жасауға мүмкіндігі жоқ. Біздер онкологиялық ауруларды жеңуге болатынына сенеміз. Әсіресе оны дер кезінде анықтап, асқындырмай емдеуді бастау керек. Аталған технология қандай географиялық өңірде орналасқанына қарамастан, метастазалық колоректальдық обыр анықталған науқастарда RAS биомаркерлерін бағалау үшін «сұйық биопсияны» жасауда оларды барынша көп қамтуға деген тілегімізге жақындауға мүмкіндік береді.
Біз науқастар мен дәрігерлердің құзырына кірмейтін мәселелерге қатысты қолдау көрсетуде өзімізге алынған әлеуметтік жауапкершілікті міндеттемелерді іске асырып жатырмыз, – дейді «Мерк» компаниясының вице-президенті әрі континентальдық аймақтар жетекшісі Яннис Влонтзос.
Айнаш ЕСАЛИ,
«Егемен Қазақстан»
АЛМАТЫ
