«Біздің қаншама замандасымыз, қаншама Ассамблея белсендісі ел игілігі үшін риясыз қызмет етіп жүр. Ұлтына, қай өңірден екеніне, жынысына қарамастан, біз олардың барлығын елге таныта білуіміз керек. Мұнда қойылатын талап біреу ғана, ол – азаматтың Қазақстан дамуына қосқан үлесі», – деді Мемлекет басшысы.
Мемлекет басшысы азаматтық бірегейлікті нығайтып, бірлік пен келісімді қамтамасыз ету қажеттігін айтып, қоғамдық келісім кеңестерінің жұмысын реттеп, олардың қызметтерінің нақты критерийлерін жасауды, Үкіметке қайырымдылықты дамыту, оның ашықтығын қамтамасыз ету жөнінде ұсыныстар енгізуді тапсырды. Бизнес, шығармашылық және ғылыми зиялы қауым өкілдерін «Туған жер» жобасына қатысуға және өз ауылдастарын қолдау үшін күш жұмылдыруға шақырды.
Ұлт пен ұлысты ұйыстырған Қазақстан халқы Ассамблеясы секілді қоғамдық институттың еліміздегі татулық пен тұрақтылықты сақтаудағы маңызы зор. Сондықтан, Ассамблея мүшелері Елбасы жүктеген міндеттерді жүзеге асыруға жұдырықтай жұмылып, белсене атсалысады деп ойлаймын.
Сессия жиынына қатысқан Шығыс Қазақстан облысындағы ҚХА ғылыми-сараптамалық тобының төрайымы Нелли Краснобаева әлеуметтік-демографиялық дамудың республикалық зерттеу институтын құру жөнінде жақсы ұсыныс айтты. Бұл ұсынысты мен де құптаймын.
Сөзімнің соңында Президенттің жуықта жарық көрген мақаласы барша қазақстандықтарға, менің замандастарыма ерекше жігер бергенін айтқым келеді.
Армен КАРАПЕТЯН,
армян этномәдени бірлестігінің мүшесі
Шығыс Қазақстан облысы
