Ленин Тәуелсіздікке жол бере ме?

«Қоштасудың қиыны-ай» деген сияқты, Пав­лодардың кеңестік кезеңмен қоштасуы да ұзаққа созылып барады. Коммунизмнің елесі әлі жүр. Облыс пен шаһардың атын ауыстыруды айтпай-ақ қоялық, еліміздің тәуелсіздік алғанына ширек ғасыр уақыт болса да қаладағы көшелер атауы бәз-баяғы қалпында, әрісі Ресей, берісі революцио­нер тұлғалардың атында. Әрине, айтысып-тартысып жүріп санаулы көше қазақ қайраткерлерінің есімдерін иеленді. Былтыр облыстық ономастикалық комиссияның шешімімен Әлия мен Мәншүкке, Бауыржан атамызға 8-9 көше атаулары бұйырды. Әрине, қа­ладан емес, ауылдардан. Бога­­тырь ауыл­ындағы Разин көше­сіне, Май­түбек ауылындағы Ленин кө­ше­сіне, Михайловка ауылын­дағы Советская көше­сіне, Ақсу қаласын­дағы Царев көше­сіне Бауыржан Момыш­ұлының есімі берілді. Енді Богатырь ауылындағы Пуга­чев көшесі, Алакөл ауылындағы Ле­нин көшесі, Железин ауылындағы Садовая көшесі, Церковная ауылын­дағы Новая көшесі, Ақсу қаласындағы Кеңестер көшесі Әлия Молдағұлова атымен аталады. Ақсу қаласындағы Энтузиастар көшесі Мәншүк Мәметова болып өзгертілді. Осылайша, шалғайдағы ауылдардағы көшелер қазақтың қаһар­ман перзенттерінің есімдерін иеленді. Кереку өңіріндегі ономастикалық ахуал айтылудай-ақ айтылып, жазы­лудай-ақ жазылып жатыр ғой. Мы­салы, Павлодар қаласындағы Суво­ров көшесін Олжабай батырдың даңқты есімімен атау керек деп айты­лып келе жатқалы қашан. Бірақ, нәтиже шамалы болып тұр. Басты­сы, тәуелсіздік төңірегіндегі, мемле­кеттілік мәселесіндегі насихат жұ­мысы кемшін түсіп жатқандай. Әйт­песе, тәуелсіз елдегі көше атауларына дейін мемлекеттік мүддемен астасып жатуы тиіс қой. Айтпақшы, жуырда облыс әкімінің есепті кездесуінде қаланың Құрметті азаматы Евгений Азаров көңілге қо­натын ұсыныс жасады: – Бүгінде шаһардан сыртқары шығатын жолдардың дені Астанаға қарай бағытталған. Сондықтан облыс орталығының басты, орталық Кутузов көшесін елорданың құр­метіне Астана көшесі, ал Ленин кө­ше­сіне Тәуелсіздіктің 25 жылдығы атауын берсек дұрыс болар еді, – деді. Азаров айтуын айтты-ау, әйтсе де, толықтай шешім қабылданбайынша көңіл шіркін сенбейді ғой. Бұл ұсыныс та сағызша созылып кетпесе жарар еді. Келмеске кеткен қоғамның көсемі тәуелсіздікке жуық арада жол бере қояр ма екен? Фарида БЫҚАЙ, «Егемен Қазақстан» ПАВЛОДАР