Жанат Жақиянов: «Қарсыласым осал болған жоқ»

Орталық коммуника­циялар қызметінде кәсіп­қой боксшы Жанат Жақияновпен брифинг өтті. Былғары қолғап шебері 10 ақпанда АҚШ-тың Толедо қала­сында америкалық Роши Уорренмен жұ­дырық түйістіріп, аса жеңіл салмақта WBA (Super) және IBO тұ­жырымы бойынша чемпион атағын жеңіп алған еді. Кездесу барысында боксшы баспасөз мәслихатын өткізіп, Құ­­рама Штаттарда өт­кен жекпе-жек туралы әңгі­мелеп берді. Кездесуде Жақиянов Роши Уорренмен айқастың оңай болмағанын, жекпе-жектің барлық раундтарында жаттықтырушысы Рикки Хаттонның ақыл-кеңестерін тыңдап, қарсыласына ешқан­дай мүмкіндікті бермеуге тырысқанын айтты. – Менің қарсыласым осал болған жоқ. Ол ке­зінде WBA (Super) және IBO тұжырымы бойынша әлем чемпионы атағын иеленген. Осы жекпе-жекте Уорреннің атағын жеңіп алдым. Бірінші раундта Уорреннің соққыларының жой­қын болатынын білген­мін. Рингке соған дайындалып шықтым. Жекпе-жектің басында екі рет нокдаун алып қалдым. Бірақ, кездесу тізгінін өзімнің қолы­ма алып, жекпе-жекті же­ңіспен аяқтадым. Ел намысы сынға түсіп жатқанда жеңілу дегенді білмеймін, білгім де келмейді. Содан болар, жекпе-жекте арқам қызып, Уорренді қуалап жүріп соққылағым келді. Ол «бесінші бұрышты» іздеп кеткенде босаңсымай, ішімнен шаруаны сол жерде тындыру керек деп шештім. Шаршы алаңда айқын ба­сым­дықпен жеңгенімді сездім. Қа­зылар алқасы да маған басым дауыспен баға берді, – деді ол. Брифингте Жақиянов осы айқасқа WBA және IBO тұжырымы бойынша бірінші орта салмақтағы әлем чемпионы Рикки Хаттонның жетекшілігімен дай­ын­дал­ғанын, жаттығу­лар­дың бәрі Ұлы­бри­танияда өт­кенін айтты. – Рикки Хаттон тамаша жаттықтырушы. Мен оның командасымен бірнеше жылдан бері жұмыс істеп келемін. Ол 2007 жылы кәсіпқой боксқа келгенімде мені байқап, өзіне шақырды. Содан бері бүгінге дейін 28 жекпе-жек өткізіп, 27 рет жеңіске жеттім. Біздің жаттығулар Ұлыбританияда өтеді. Ол жақта бәрі жақсы ұйымдастырылған. Мысалы, соңғы жекпе-жекке 10 апта дайындалдым, – деді Жанат Жақиянов. Сонымен бірге, ол шет елден шақыртулар келіп жатса ешқайда кетпейтінін мәлімдеді. Өзіне қолдау көрсетіп, демеушілік жасап жатқан Солтүстік Қазақ­стан облысының әкімдігі мен жер­гілікті спорт басқармасына алғысын білдіретінін айтты. – Мен ешқайда кетпеймін. Кеткім де келмейді. Менің Отаным – Қазақстан. Қазақ елінің намысын қай жерде болса да қорғап, аспан түсті туымызды биікте желбіретіп жүремін. Қазір Петропавл қаласында облыстық балалар және жасөспірімдерге арналған мектеп-интернатта жаттықтырушы болып қызмет етемін. Биыл біздің мектептің үш тәрбиеленушісі «Спорт шебері» атанды. Алдағы кезде де спорт ордасынан талай жас талантты боксшылардың түлеп шығатынына сенімдімін. Қазір облыста боксқа қызы­ғатын балалар көп. Мұ­ның бәрі облыс әкімі мен спорт басқармасының спорт мек­тептеріне көрсетіп жатқан қолдауының арқасы, – дейді боксшы. Кездесу соңында Жақия­нов келесі қарсыласы Джеймс Мак­доналдстің болуы мүм­кін екенін айтты. Дастан КЕНЖАЛИН, «Егемен Қазақстан» АСТАНА