Былтыр «Ертіс орманы» табиғи резерватының ғылым, ақпарат және мониторинг бөлімі жүргізген далалық зерттеу нәтижесінде орман аумағында бұрын тіркелмеген 40 құс түрі анықталған. Олардың ішінде Павлодар облысында алғаш рет тіркелген түрлер де бар.
«Ертіс орманы» мемлекеттік табиғи резерваты – еліміздегі биоалуантүрлілігі жоғары, ғылыми маңызы зор аумақтардың бірі. Қазір мұнда құстардың 90 түрі тіркелген. Оның ішінде 10 түрі еліміздің Қызыл кітабына енген. Сондай-ақ өсімдіктердің 307 түрі мен сүтқоректілердің 21 түрі анықталған.
«Былтыр резерват мамандары зерттеп, анықтаған, бұрын-соңды кездеспеген құс түрлерінің ішінде кәдімгі жыланжегіш (Circaetus gallicus), ементұмсық (Coccothraustes coccothraustes), азиялық қарабас шақшақ (Saxicola maurus), қызылқұлақ сұлыкеш (Emberiza cioides) сынды құстар бар. Біразы бұған дейін Ертіс-Баян өңірінде ұшыраспаған, алғаш тіркеліп отыр», деп хабарлады резерват өкілдері.
Мекеме басшылығы алдағы уақытта да мониторинг жасауды жүйелі жалғастыра беретіндерін айтады. Табиғи байлықты сақтау мен қорғауда «Ертіс орманының» алатын маңызы арта түспекші.
Павлодар облысы