Таяу Шығыстағы жағдай барған сайын шиеленісіп барады. Иран тарапы Израиль Премьер-министрі Беньямин Нетаньяхудың кеңсесіне соққы жасалғанын мәлімдеді. Қазіргі уақытта саясаткердің тағдыры белгісіз. Бұл туралы ирандық Tasnim агенттігі Ислам революциясы сақшылар корпусының мәлімдемесіне сілтеме жасап хабарлады, деп жазады Egemen.kz
ИРСК дерегінше, кеңсе «Kheibar» зымырандары арқылы атқыланған. Шабуыл Иранның қарсы соққыларының 10-шы толқыны аясында жүзеге асқан. Сонымен қатар Израиль әскери-әуе күштері қолбасшысының орналасқан жеріне де соққы берілгені айтылды.
Ұлыбритания, Германия және Франция Иранға ескерту жасады
Израиль Премьер-министрінің кеңсесі әзірге бұл ақпаратқа қатысты ресми түсініктеме берген жоқ. Аймақтағы эскалация 28 ақпанда Израиль мен АҚШ-тың Иран аумағына жасаған соққыларынан кейін күшейді. Үшінші күн қатарынан Ислам Республикасы әуе шабуылдарына ұшырап жатыр. Иран тарапы бұл соққылар салдарынан елдің әскери-саяси басшылығы, соның ішінде рухани көшбасшы аятолла Әли Хаменеи қаза тапқанын мәлімдеді.
Трамп Иранға қарсы операция мерзімін атады
Жауап ретінде Тегеран аймақ бойынша дрондар және баллистикалық зымырандар арқылы соққы беруде. АҚШ Президенті Дональд Трамп видеоүндеу жасап, Иран тұрғындарын паналау орындарында болуға шақырып, «бомбалар барлық жерде түседі» деп ескерткен. Парсы шығанағы елдерінің әуе кеңістігі жабылғаны хабарланды.
1 наурызда Иран тарапы 560 америкалық әскери қызметкер қаза тапқанын және жараланғанын мәлімдеді. Алайда АҚШ бұл көрсеткіштерді растаған жоқ. АҚШ Қарулы күштерінің Орталық қолбасшылығы Иранға қарсы операция барысында 3 америкалық әскери қызметкердің қаза тапқанын хабарлады.
Иран неге америкалық және израильдік ұшақтарды атып түсіре алмайды?
Аймақтағы әскери қақтығыс ауқымы кеңейіп келеді. Жағдайдың әрі қарай қалай өрбитіні тараптардың саяси шешіміне байланысты болмақ.