Фото: Туризм және спорт министрі
Чемпионды жанкүйерлер, туған-туыстары және спорт саласының өкілдері күтіп алды. Ербол Хамитов пен ұлттық құраманың спортшыларын Туризм және спорт министрі Ербол Мырзабосынов және Ұлттық паралимпиада комитетінің өкілі Бахыт Сапаров құттықтады.
«Бүгін – еліміз үшін қуанышты күн. Тарихымызда алғаш рет Паралимпиада ойындарында пара биатлоннан алтын медаль жеңіп алып, оған қоса бір Паралимпиадада екі бірдей медаль еншіледік. Бұл нәтиже – ерен еңбек пен тыңғылықты дайындықтың, мықты рухтың көрінісі. Осы ойындарға ұлттық құрама 7 спортшымен 2 спорт түрінен қатысып, жалпыкомандалық есепте 18-орынға тұрақтады. Спортшылардың әрқайсысы ел намысын абыроймен қорғады. Біз сіздермен мақтанамыз», деді Ербол Мырзабосынов.
Іс-шара барысында демеушілік танытқан құрылыс компаниясы Ербол Хамитовқа екі бөлмелі пәтердің кілтін табыстады.
Ербол Хамитов – Паралимпиада жүлдегері!
Өз кезегінде спортшы да жанкүйерлеріне алғысын білдіріп, арман-мақсатқа адал болу керек екенін атап өтті. Ол бұл жетістік алдағы уақытта бұдан да үлкен нәтижелерге жетуге мотивация беретінін айтты.
Айта кетейік, 6-15 наурыз аралығында Италияның қалаларында қысқы Паралимпиада ойындары өтті. Дүбірлі додаға әлемнің 55 елінен 600-ден астам спортшы қатысып, 79 медаль жиынтығы сарапқа салынды.
