Ауқымды іс-шара 2026 жылғы 25-27 ақпан күндері өтеді. Оның негізгі мақсаты – көктемгі су тасқыны кезеңінде туындауы мүмкін төтенше жағдайларға Азаматтық қорғау мемлекеттік жүйесі мен халықтың дайындығын арттыру, сондай-ақ азаматтық қорғау қызметтері мен құралымдарының жедел әрекет ету қабілетін тексеру.
Оқу-жаттығуды үйлестіру және басқару жөніндегі республикалық штаб Астана қаласында, Төтенше жағдайлар министрлігі Стратегиялық жоспарлау және жедел басқару орталығының базасында жұмыс істейді.
Шараға республикалық азаматтық қорғау қызметтері, орталық және жергілікті атқарушы органдар, сондай-ақ авариялық-құтқару қызметтері мен арнайы құрылымдар қатысып жатыр.
Жаттығу аясында еліміздің әр өңірінде төтенше жағдайларды жою бойынша басқару шешімдерін пысықтау, командалық-штабтық оқу-жаттығулар өткізу, сондай-ақ авариялық-құтқару қызметтері мен азаматтық қорғау күштерінің практикалық іс-қимылдары ұйымдастырылады.
«Сонымен қатар, оқу-жаттығу барысында «Баршаның назарына!» сигналы бойынша аумақтық деңгейдегі құлақтандыру жүйесінің дайындығы тексеріледі. 2026 жылғы 25 ақпанда сағат 11:00-де еліміздің барлық өңірлерінде сирена-сөйлеу құрылғылары мен электрсиреналар іске қосылады. Осыған байланысты тұрғындарды сабыр сақтап, алаңдаушылыққа бой алдырмауға шақырамыз», делінген министрлік хабарламасында.
