«Қазгидромет» таратқан мәліметке сәйкес, 1 ақпанда Қостанай, Көкшетау, Павлодар, Қарағанды, Теміртау, Өскемен, Семей, Риддер, Ақтөбе, Алматы, Астана қалаларында, сондай-ақ түнгі уақытта Петропавл қаласында ауаның ластануына ықпал ететін қолайсыз метеорологиялық жағдайлар күтіледі.
Қолайсыз метеорологиялық жағдайлар (ҚМЖ) — бұл қысқа мерзімді метеорологиялық факторлардың (тынық ауа, әлсіз жел, тұман, температуралық инверсия) жиынтығы. Мұндай жағдайлар атмосфераның жерге жақын қабатында зиянды (ластаушы) заттардың жиналуына әкеледі.
ҚМЖ кезінде қала тұрғындарына, әсіресе автокөлік жолдары мен басқа да ластану көздеріне жақын жерлерде, ашық ауада болу уақытын қысқарту ұсынылады. Ал өкпе, жүрек-қан тамырлары және аллергиялық созылмалы аурулары бар адамдарға сыртқа шыққан кезде өздеріне қажетті дәрі-дәрмектерді бірге алып жүру қажет.
