Көрмеде Алматы музейі мен М. Әуезов атындағы Қазақ ұлттық драма театры музейінің қорынан алынған театр тарихына қатысты бірегей архивтік құжаттар мен фотосуреттер, 1940 жылдардан бүгінгі күнге дейінгі спектакль афишалары ұсынылды.
Аида Балаева Әуезов атындағы драма театрын 100 жылдық мерейтойымен құттықтады
Әсіресе қазақ театр өнерінің көрнекті майталмандары киген сахналық костюмдер елдің назарын аударды. Мысалы, Ә.Молдабековтің «Ваня аға» спектакліндегі, Ш.Жандарбекованың «Ақан сері – Ақтоқты», З.Шәріпованың «Отелло» спектаклінде Дездемона рөлінде киген, Т.Жаманқұловтың Абылай хан бейнесіндегі сахналық киімдері сияқты құнды экспонаттар көрмеге қойылды.
Көрме ғасырлық тарихы бар ұлттық театрдың шығармашылық жолын кеңінен насихаттап, көрерменді қазақ театр өнерінің даму кезеңдерімен таныстыруды, жас ұрпақтың рухани-мәдени құндылықтарға деген қызығушылығын арттыруды көздейді.
Көрменің ашылу рәсіміне Алматы қаласы Мәдениет басқармасының өкілдері, шығармашылық интеллигенция, өнер қайраткерлері, бұқаралық ақпарат құралдарының өкілдері, сондай-ақ қала тұрғындары мен қонақтары қатысты.
Көрме ақпан айының соңына дейін жалғасады.
