Фото: Астана әкімдігі
Наурызбек JOLTAP жобасы жөнінде жұбайы арқылы білген. Ал жары бұл мүмкіндік туралы TikTok желісіндегі жарнама арқылы көрген екен. Ақпарат қызықтырған соң, екеуі арнайы барып, оқу шарттарымен танысуды ұйғарған.
Қатысушының айтуынша, сабақтар түсінікті әрі жүйелі түрде ұйымдастырылған.
«Маған бәрінің кезең-кезеңімен, стандарт бойынша өтетіні ұнады. Түсіндіруі де жеңіл, қадамдап үйретеді. Бұл алған білімді іс жүзінде қолдану үшін өте маңызды», дейді Наурызбек.
«JOLTAP» әлеуметтік жобасы: 1 000-нан астам азамат жұмысқа орналастырылды
Ол бірнеше жылдан бері алюминий терезе, витраж, есік пен қалқа жасаумен айналысып келеді. JOLTAP жобасы аясындағы оқу барысында бұрынғы тәжірибесін жүйелеп, жаңа дағдыларды меңгеруге мүмкіндік алған.
Техникалық біліммен қатар, заманауи технологиялар мен бизнес жүргізуге қатысты бағыттар да оны қызықтырған.
«Клиенттер санын көбейту және өзімді дамыту үшін жасанды интеллект пен сатылым бойынша білім алғым келді. Қазір сатылым курсын оқып жатырмын және алған білімімді бизнесімде қолданып жүрмін», деп бөлісті ол.
Наурызбек бүгінде JOLTAP жобасы арқылы алған білімі нақты нәтиже беріп жатқанын айтады. Сондай-ақ ол кәсіби дамуға және алға ұмтылуға мүмкіндік жасаған жоба ұйымдастырушыларына алғысын білдірді.
