Бұл есім жанкүйерлерге жақсы таныс. Сергей Прокопьевич 1938 жылдың 6 қазанында Өскеменде туып-өсті. Ол отбасындағы 12-перзент еді. Бозбала шағынан футболға қызыққан Квочкиннің жұлдызды сәттері «Қайратта» өтті. 1959-1969 жылдар аралығында алматылық клубтың сапында 292 рет жасыл алаңға шыққан шабуылшы қарсыластары қақпасын 74 мәрте дәл көздеді. Бұл – сол кездегі қазақстандық футболшылар арасындағы ең үздік көрсеткіш еді. Сергей 1962 жылы КСРО клубтары құрамы сапында Оңтүстік Америкада өткен жолдастық кездесулерге қатысты. Сол кезде ол Рио-де-Жанейродағы әйгілі «Маракана» стадионында Бразилияның олимпиадалық командасының қақпасына жеңіс голын соқты.
Үлкен спорттан қол үзгеннен кейін Сергей Квочкин Қазақстанның бірқатар клубын жаттықтырды. Ол 2009 жылдың 29 желтоқсанында 70 жасқа қараған шағында қайтыс болды.
