Демеушілердің қаражаты есебінен салынған жаңа кешен 550 орынға арналған. 9333 шаршы метрді құрайтын алаңда футбол, баскетбол, волейбол залдары, сондай-ақ, жекпе-жек пен жеңіл атлетикаға арналған залдар бар.
Бүгінде Маңғыстау облысының 25% халқы, яғни 158 250 адам дене шынықтырумен және спортпен айналысады. 12 мың бала 18 балалар мен жасөспірімдер спорт мектебіне тегін қатысады. 569 спорт ғимаратының 260-ы ауылдық жерлерде орналасқан.
2016 жылы 14 жаңа нысан іске қосылды. Осы жылы «Маңғыстау-Арена» спорт сарайы мен Ақтау қаласындағы «Батыр» спорт кешенінің құрылысы аяқталды. Алдағы уақытта тағы да бес нысанның құрылысы басталады. Қазақстан Республикасының Президенті Нұрсұлтан Назарбаев Маңғыстау облысының жастарымен және спортшыларымен кездесіп, олардың оқуларына сәттілік тіледі, делінген хабарламада.
Гүлайым Шынтемірқызы,
«Егемен Қазақстан».
Маңғыстау облысы
