Сенбілік жұмысына облыс әкімі Кәрім Көкірекбаев қатысып, Тараз қаласындағы Қабылбек Сарымолдаев атындағы №1 балалар үйінің ауласына 60-тан астам тал көшеттері отырғызылды. Сондай-ақ тал-дарақтармен қатар, алма, алмұрт, декоративті ағаштар отырғызу жұмыстары облыстағы жоғары және орта арнаулы оқу орындарының студенттері мен қала тұрғындарының қатысуымен «Әулие-ата» Халықаралық әуежайында және №1 қалалық ауруханасында жалғасты.
Облыстың барлық елді мекендерінде жаппай өткізілген көктемнің алғашқы сенбілігіне облыс жастары мен қала тұрғындары қамтылды. Сенбілікке шығушылар айналаны көгалдандыруға, қала, аудан, ауыл маңдарын, көшелерін тазартуға, спорттық кешендер мен өзен жағалауларын қалпына келтіруге, саябақтар мен құрылыс алаңдарын тазартуға атсалысты.
Хамит Есаман,
«Егемен Қазақстан»
