Алғашқы ойындағы жеңілісті қаперінде ұстаған өскемендіктер бірден алға ұмтылды. Алайда, алғашқы шайбаны бірінші болып жіберіп алды. 3-минутта қонақтар сапынан Андрей Корабейников қақпаны дәл көздеп, «Рубинді» алға шығарды. Өз жанкүйерлерінің алдында өнер көрсетіп жатқан шығысқазақстандықтар алғашқы кезеңде таразы басын теңестіру үшін барын салды. Гол соғатын мүмкіндіктер болғанмен, сәттілік жолдас болмады.
Есесіне жерлестеріміз ойынның келесі бөлігінде түмендіктерді екі мәрте қапы қалдырды. 33-минутта Евгений Рымарев мергендігімен көзге түссе, араға төрт минут салып екінші голдың авторы атанды. Бұл тұста ресейліктердің бір ойыншысы кем болғанын айта кеткен жөн.
Матчтың үшінші кезеңі де дәл осы бағытта өрбіді. Ә, дегеннен-ақ алға ұмтылған Алексей Ждахин шәкірттері 41-минутта үшінші шайбаны соғып үлгерді. Бұл шақта Евгений Рымарев хет-тригін жасаған еді. Негізгі уақыттың аяқталуына санаулы минуттар қалғанда қонақтар қақпашыны айдындағы ойыншыға алмастырып, жанұшыра алға ұмтылған болатын. Алайда, бұл да «Торпедо» үшін орайы келген мүмкіндік болды. Леонид Метальников бос қақпаны алыстан дәл көздеп, соңғы нүктені қойды.
Алғашқы ойында 0:1 болып ұтылған өскемендіктер осылайша есе қайтарды. Қос команданың арасындағы жалпы есеп 1:1. Келесі екі матч 1 және 2 сәуір күндері Түменде өтеді.
Аян ӘБДУӘЛИ,
«Егемен Қазақстан»
