Қоладан жүлде жинадық

Күншығыс елінің Саппоро қаласында өтіп жатқан VIII қысқы Азия ойындарының көрігі қыза түсті. Төртінші жарыс күні Қазақстан құрамасының қоржынына үш бірдей қола медаль сыйлады. Сонымен қатар, шайбалы хоккей сынын бастап кет­кен ел құрамасы оңтүстіккореялық қар­сы­ластарын 4:0 есебімен күйрете жеңді. Шаңғымен тұғырдан секіру жарысында еліміздің намысын қорғаған Сергей Ткаченко 238.0 метр нәтижемен үшінші орынға табан тіреді. Бұл бә­секеде бәрінен алыс секірген жапон жігіті Юкия Сато (254.0) алтын жүлде иегері атанды. Екінші жүлде – күміс медаль чемпионның жер­лесі Юкен Ивасаға (251.0) бұйырды. Қыздар арасындағы шорт-трек­шілер сайысында Қа­зақстан құрама ко­мандасы тәп-тәуір нәтижеге қол жет­кізді. Құрамында Ким Йонг А, Анастасия Крестова, Мәдина Жан­босынова және Ольга Тихонова бар желаяқ қыз­дарымыз 4:20.034 минут нәтижемен қола жүлдеге ие болды. Біздің шорт-трек­ші арула­рымыздың жолын Оң­түстік Ко­рея (4:10.515) және Қытай (4:10.980) құрамалары орап кетті. Бұл күні конькиші жігітте­ріміз де көңілді көтеріп тастады. Ерлер арасындағы қудалау бә­с­екесінде құрамында Дми­т­рий Бабенко, Денис Кузин және Федор Мезенцев өнер көрсеткен Қазақстан командасы қола ме­дальға қол жеткізді. Бұл жарыс­та Оңтүстік Корея мен Жапония командалары үздік нәтиже көрсетті. Қазақстан хоккейшілері Азиа­да сынындағы алғашқы кез­­десуін Оңтүстік Корея құра­­ма­сымен өткізді. Сергей Ста­рыгиннің шәкірттері сенімді ойын өрнегін көрсетіп, 4:0 (0:0, 2:0, 2:0) есебімен жеңіске жетті. Командалар матчтың бі­рінші бөлігінде тең тарқасты. Екінші кезеңнің 34-минутында Максим Волков қарсылас қақпадан саңылау тауып, есеп ашты. Арада екі минут өтке­нінде Никита Михайлис есепті еселеді. Шешуші кезеңнің 47-ші минутында Нұрсұлтан Белгібаев есепті 3:0-ге жеткізді. Ал соңғы – төртінші шайбаны ойынның 54-минутында Константин Са­вен­ков салды. Енді біздің хоккейшілер келесі ойынды 24 ақпан күні Қытай құрамасымен өткізеді. Әзірге Қазақстан құра­масы­­ның еншісінде жеті жүл­де бар. Оның біреуі алтын, екеуі күміс және төртеуі қола. Медаль саны бо­йын­ша жалпыкомандалық есепте төртінші орында тұрмыз. Бұл бәсекеде 30 медальмен (12 алтын, 11 күміс және 7 қола) Оңтүстік Корея құрамасы көш бастап келеді. Екінші орындағы Жапония қоржынында 34 медаль (10, 11, 13) бар. Ал үшінші орында 16 медальмен (6,5,5) Қытай құрамасы келеді. Қайрат ӘБІЛДИНОВ, «Егемен Қазақстан»,