Жеңімпаздық жетістіктері

Алматыдағы Орталық музейде XXVIII Дүниежүзілік қысқы Универсиада аясында «Қазақстан спортының тарихы» атты көрме келушілерге есік ашты. Көрменің ашылу салта­натына Олимпиада чем­пио­ны Жақсылық Үшкемпіров, КСРО-ның еңбек сіңірген жаттық­­тырушысы Хван Май Ундеевич, самбодан халық­аралық дәре­жедегі төреші Михаил Шепетюк сынды спорт ардагер­лері, таны­мал жас спорт­шылар мен Қазақ спорт және туризм акаде­миясының өкілдері қатысты. Мемлекеттік орталық мұра­жай директорының бірінші орынбасары Бейбітқали Қақа­баев өз сөзінде аталған көр­ме­­нің Алматы қаласындағы орта мек­теп­тер үшін Қазақстан спорты­­ның тарихымен таныс­ты­ру­ға бағытталған танымдық бағ­дарлама екенін жеткізді. Мұражайдың қор бөлі­мінде сақталған спорттық топтама­­лар мен құжат­тар негізінде Қазақ­стандағы спорт түрлері­нің, оның ішін­де ұлттық спорттың даму тарихы баяндалады. Екі бө­лім­нен тұратын «Қазақстан спортының тарихы» атты көр­ме­де құжаттар, фотосуреттер, заттық экспонаттар, арн­айы спорт киімдері, эмблемалар, кәдесый бұйымдары, спорттық ақпараттар хронологиялық түр­де рет-ретімен қойылған. 1943 жылы өткен Орталық Азия және Қазақстан респуб­лика­лары­­ның спартакиадасына арнап жасал­ған мұқабасы ағаш алып аль­бом, Қажымұқан балуан киген тымақ тәрізді біре­гей экспо­нат­­тар­мен қатар, Азия ойын­дары­на қатысқан қазақ­стандық спортшылар киген формалар да келушілер наза­рына ұсынылыпты. Кеңес Одағы тұсында түр­лі спорттық дәрежелерге қол жеткізіп, ел мақтанышы­на ай­нал­ған жерлестеріміз Ғұс­­ман Қо­санов, Евгений Яро­вен­­ко, Әл­жан Жармұха­медов, Нелли Ким, Жақсы­лық Үш­­кемпіров, Шәміл Се­ріков, Аманжол Бұғыбаев, Қаб­­­­ден Байдосов, Анато­лий Хра­­­­­па­тый, Хван Май Ун­дее­вич, Қазбек Уәлиев, Серік Қо­нақ­­­баев сынды әйгілі спорт­шылар­дан бастап, күні кеше Сид­ней, Афина, Бей­жің, Лон­дон қалаларында өткен олим­­пия ойындарында ел намы­сын қолдан бермей, көк бай­рағы­мызды желбіреткен отан­дас­тарымыздың толайым табыс­та­ры мен марапаттарын көрме­ден көріп қайтқан кез кел­ген жастың спортқа деген қызығу­шы­лығы арта түспесе, кемімесі анық. Ұлттық және халықаралық спорттың дамуына зор үлес қос­қан спортшыларды, сонымен қатар, еліміздің спорт саласында қол жеткізген табыстарын өске­лең ұрпаққа таныстыруды мақ­сат еткен бұл көрме екі айға созылмақ. Мира БАЙБЕК, «Егемен Қазақстан» АЛМАТЫ