Лайықты баға және Венецияға жолдама

Күні кеше Мәдениет және ақпарат ми­нистрлігі 61-ші Вене­ция биенналесіндегі Ұлт­тық павильонға арнал­ған кура­торлық ұсыныстар кон­курсының қорытындысын жариялады. Еске сала ке­тейік, конкурс 2025 жылдың қараша айында жарияланып қойған. Ондағы мақсат – биылғы Биенналеде «In Minor Keys» тақырыбын ашатын, тұжырымдамалық және көркемдік тұрғыдан біртұтас жобаны іріктеу және Қазақстанның заманауи өнерін халықаралық деңгейде таныстыру. Аталған байқау­да дауыс беру нәтижесі бо­йын­ша «ҚОҢЫР: архив үні» тұжы­рымдамасы жеңімпаз атанды. Жобаның кураторы – Сырлыбек Бекботаев.

Конкурс ұлттық павильонды дайындауда ашық әрі тұрақты тәжірибені қа­лыптастыру мақсатында ұйымдастырылды. Өті­нім­дер бір ай бойы қабылданды. Іріктеу екі кезеңнен тұр­ды. Бірінші кезеңде ұсы­ныл­ған материалдарға сарап­та­ма­лық бағалау жасал­ды, ал екінші­сінде финалистермен онлайн-сұхбат жүргізілді.

Бірінші кезеңнің финалына үш жоба өтті. Екінші кезеңде қазылар алқасы әр­бір финалиспен онлайн-сұх­бат өткізіп, талқылау қоры­тын­дысы бойынша ақтық дауыс беру парақтарын толтырды.

Іріктеу комиссиясы пән­аралық сараптама қа­ғи­даты бойынша құ­ры­лып, оның құрамында заманауи өнер, өнертану, тәуел­сіз театр мен музыка сала­ларындағы жергілікті және халықаралық маман­дар, сондай-ақ акаде­мия­лық қа­уымдастық пен мемле­кеттік музейлер өкіл­дері отырды.

Конкурсқа кураторлар мен кураторлық топтарға ел аза­маттары, куратор­лық қыз­мет тәжірибесі бар ма­мандар шақырылды. Қазақстанда тұ­­ратын және жұмыс істей­тін үміт­кер­лерге басымдық берілді. Халық­аралық көрме­ге жолдама алған Сырлыбек Бек­ботаев – суретші әрі ку­ра­тор, Астана қаласында тұ­рып жұмыс істейді. Оның шы­ғармашылығы мен мол тәжі­рибесі көшпелілер өмірі мен мәдени мұра тақы­­ры­бына арналған. 2025 жылы ол Л.Н.Гумилев атын­дағы Еуразия ұлттық уни­верситетін «Мәде­ниет­тану» мамандығы бойынша тәмамдаған.

Венеция биенналесі 1895 жылдан бастап Вене­ция­да екі жылда бір рет өткі­зілетін ең беделді халық­аралық көрмелердің бірі екенін атап өткен жөн. Бұл айтулы оқиға әлемдік өнер­дің даму бағытын айқын­дай­ды, сондай-ақ заманауи трендтерді кеңінен ­та­ныс­­тырады.