Жақында Жезқазған қаласында Ұлттық банктің Ұлытау облысындағы филиалы ғимаратының ресми ашылуы өтті. Салтанатты іс-шараға Ұлттық банк Төрағасы Тимур Сүлейменов пен Ұлытау облысының әкімі Дастан Рыспеков қатысты.
Ғимарат штат санына қарай 60 қызметкерге есептелген. Мұнда арнайы сақтау қоймасы, касса қызметін көрсету аймақтары, жұмыс процесі мен қоғамдық іс-шаралар үшін арнайы орындар қарастырылған. Қолжетімді орта қағидатын іске асыру аясында қозғалысы қиын азаматтарға да жағдай жасалған.
Жаңа ғимаратта музей ашу жоспарда бар, онда ҚРҰБ банкноталары мен монеталарынан тұратын коллекция қойылып, өңірдің қаржы жүйесінің даму тарихын баяндайтын арнайы экспозиция болады.
