Фото: pinterest.com
Бұл туралы Associated Press хабарлады. Еуропа елдері Арктикадағы стратегиялық маңызы зор, пайдалы қазбаларға бай аралдың «Гренландия халқына тиесілі» екенін атап өтті. Ортақ мәлімдемеде аралдың тағдыры сырттан шешілмейтіні қадап айтылған.
Мәлімдемеге Франция, Германия, Италия, Польша, Испания және Ұлыбритания көшбасшылары қол қойды. Олар Дания премьер-министрі Метте Фредериксенмен бірге Трамптың сөзінен кейін Гренландияны қорғап шықты. Еуропа басшылары Гренландияның Дания Корольдігінің құрамындағы өзін-өзі басқаратын аумақ екенін, сол арқылы НАТО-ның бір бөлігі саналатынын еске салды.
«Гренландия – сол жерде тұратын халықтікі. Дания мен Гренландияға қатысты шешімді тек солардың өзі қабылдайды», делінген ортақ ұстанымда.
Бұл пікірді Канада да қолдады. Канада премьер-министрі Марк Карни алдағы айдың басында генерал-губернатор Мэри Саймон мен сыртқы істер министрі Анита Ананд Гренландияға баратынын айтты. Парижде сөйлеген сөзінде ол Гренландия мен Данияның болашағын тек Дания халқы анықтайтынын атап өтті.
Гренландияның маңызы бекер емес. Арал жүздеген жыл бойы Дания Корольдігінің колониясы болған, ал 1953 жылы оның ажырамас бөлігіне айналды. ХХ ғасырдың басында АҚШ үкіметі Данияның Гренландияға толық құқығын ресми түрде мойындаған.
Географиясы да ерекше. Гренландия Канаданың солтүстік-шығысында орналасқан, аумағының үштен екісінен астамы Арктикалық шеңбер аумағында жатыр. Осы себепті арал Екінші дүниежүзілік соғыстан бері Солтүстік Американың қорғаныс жүйесінде маңызды орын алып келеді.
Қазір АҚШ Қорғаныс министрлігі Гренландияның солтүстік-батысындағы Питуффик қашықтағы ғарыш базасын басқарады. Бұл база 1951 жылғы Дания мен АҚШ арасындағы Қорғаныс келісімінен кейін салынған. Ол зымыран соққыларын бақылау, зымыранға қарсы қорғаныс және ғарыштық бақылау жүйелері үшін пайдаланылады.
Сонымен қатар Гренландия GIUK Gap – Гренландия, Исландия және Ұлыбритания арасындағы аймақты бақылауға мүмкіндік береді. Бұл аумақта НАТО Солтүстік Атлантикада Ресей флотының қозғалысын қадағалайды.
