Жиынға Қазақстан Қарулы Күштері Бас штабының ұйымдастыру-жұмылдыру жұмыстары департаментінің басшысы, генерал-майор Мүслім Дайыров, Бас штабтың ұйымдастыру-жұмылдыру жұмыстары департаменті басшысының орынбасары – толымдау басқармасының басшысы, полковник Амантай Үсербаев, Қорғаныс министрлігі әскери-дәрігерлік комиссия орталығының басшысы, полковник Қанат Сұлтанғазин және Қарулы Күштердің әскери полициясы бас басқармасының басшысы, полковник Тілеухан Басқожаев қатысты.
Спикерлер көп ата-аналарды алаңдатып отырған әскери әлімжеттіктің жоқ екенін атап көрсетті. «Біздің Қарулы Күштердің құрамында 70 пайыздай келісімшартпен қызмет атқаратын жоғары білімді азаматтар бар. Солардың арасында 30 пайыздайы ғана мерзімді әскери қызметке келетін азаматтар. Қазіргі уақытта казармамызда барлық жағдай жасалған. Әрбір казармада бейнебақылау қойылған. Әскерге келген әрбір бозбаламен психолог мамандар жүйелі жұмыс атқарады. Ақпарат құралдарының барлығына айта кетейін, біздің қазіргі Қарулы Күштеріміздегі жүйелі жұмыстың нәтижесінде әлімжеттік деген жоқ, – деді А.Үсербаев.
Ер-жігіттер болған соң олардың арасында түсініспеушілік орын алып жататын жағдайлар кездесетіні жасырын емес. Бірақ жүйелі түрде болатын әлімжеттік жоқ деуге болады. «Сондықтан, барлық ата-аналарға айтарым, балаларыңызды қорықпай Отан алдындағы борышын өтеуге жібере беріңіздер. Себебі, олар үшін барлық жағдай жасалған», – деді тағы да Амантай Үсербаев.
2017 жылдың көктемінде Қазақстан Республикасының Қарулы Күштеріне, басқа да әскерлері мен әскери құралымдарына 1990-1999 жылдары туған 16 мыңнан аса азаматты шақыру жоспарланып отыр.
Рауан Қайдар,
«Егемен Қазақстан»
