Отырысты ашқан «Нұр Отан» партиясы Төрағасының бірінші орынбасары 2006 жылы Мемлекет басшысы өзінің ауқымы жағынан теңдесі жоқ әкімшілік реформалардың бастау алуына серпін бергенін еске салды. Сол кезде Президент таразының бір басында мемлекеттік қызмет алушылардың мүддесі, сондай-ақ, озық халықаралық тәжірибелер ескерілген корпоративтік басқару, ашықтық пен есептілік қағидаттары тұратын мемлекеттік басқарудың сапалы жаңа үлгісін құруға кіріскенімізді атап өткен болатын. Нәтижесінде, біздің ел посткеңестік кеңістікте бірінші болып «Мемлекеттік қызмет туралы» Заң қабылдады және мемлекеттік қызмет істері жөніндегі арнайы өкілетті орган құрды.
«Бұл мәселеге айрықша үңілу қажеттілігі мемлекеттік аппараттың сапалы қызметі елдің тұрақты дамуын қамтамасыз ететін және уақыттың жылдам өзгеріп отыратын сын-тегеуріндеріне дер кезінде жауап қайтаратын шешуші факторлардың бірі болып табылатынымен байланысты болып отыр», – деді өз сөзінде Мұхтар Құл-Мұхаммед.
Сондай-ақ, «Нұр Отан» партиясы Төрағасының бірінші орынбасары: «Биылғы жылы Мемлекет басшысының бастамасымен Қазақстан Конституциясына тарихи түзетулер енгізілді. Ол мемлекеттік басқарудың түбегейлі жаңа үлгісінің негізін қалады. Атқарушы биліктің өкілеттігі айтарлықтай ұлғайды, сонымен бірге, барлық деңгейдегі мемлекеттік қызметкерлердің жауапкершілігі күшейді. Сондықтан сапалы жаңа аппаратты қалыптастыру жөніндегі Елбасы алға қойған міндеттер мүлтіксіз орындалуға тиіс. Бізге заңдылықты қатаң сақтайтын, кәсіби жағынан білікті және жауапкершілігі зор мемлекеттік қызметкерлер керек», – деді.
Бұған қоса, жиында кәсіби мемлекеттік аппаратты қалыптастыру Бес институттық реформаның бірінші бағыты екені айтылды. Мәселен, «100 нақты қадам» Ұлт жоспарының осы мәселеге арналған 15 қадамының 11-і толық жүзеге асырылған. Атап айтқанда, «Мемлекеттік қызмет туралы» жаңа Заңның арқасында меритократия, яғни анағұрлым лайықты және кәсіби мамандарды басшылық қызметке ілгерілету қағидатына негізделген мансаптық өсудің жаңа үлгісі енгізілді. Нәтижесінде, 2016 жылы 6 мыңнан астам мемлекеттік қызметкердің мансабы жоғарылады. Бұл 2015 жылғымен салыстырғанда 4 есе көп. Бұдан бөлек, командалық ауысуды айтарлықтай деңгейде азайтуға қол жеткізілген. Мәселен, өткен жылы ол 2015 жылмен салыстырғанда 18 есеге дейін кеміпті.
Іс-шара аясында сөз алған Мемлекеттік қызмет істері және сыбайлас жемқорлыққа қарсы күрес агенттігінің төрағасы Қайрат Қожамжаров партиялық тыңдау барысында мемлекеттік аппаратты жаңғырту туралы егжей-тегжейлі әңгімелеп берді. «Елбасымыз қолға алған жаңғырту үдерістері ішіндегі «100 нақты қадам» Ұлт жоспары бойынша бірінші бағыт біздің агенттікке жүктелген. Депутаттардың қолдауымен заң қабылданды. 1 жылдай сол заңның талаптарына сәйкес жұмыс атқарып келеміз. Әрине, осы уақыттың ішінде бірқатар өзекті мәселелер айқындалып отыр. Ал ол мәселелерді біз бүкіл халық болып шешуіміз керек. Ең бастысы, ол – халықтың билікке деген сенімі. Екіншіден, мемлекеттік органдардың халықтың мүддесіне және Елбасының стратегиялық мақсат-міндеттеріне сай жұмыс атқаруы», – деді Қайрат Қожамжаров.
Сондай-ақ, жиын барысында мемлекеттік қызмет саласындағы өзгерістерге қатысты ой-пікірлер айтылды. Дәлірегі, мансаптық ілгерілеу біліктілік талаптарына байланысты жүзеге асатыны, бұл кәсіби мемлекеттік аппаратты жақсартуға мүмкіндік беретіні атап көрсетілді. Бұған қоса, мемлекеттік қызметшінің тек қызмет өтілі ғана емес, сонымен қатар, оның шешімдерді қабылдай білуі, егер, ол басшы болса, ұжымды басқара алуы, оны белгілі бір мақсаттарға ынталандыра алуы секілді біліктіліктері назарға алынды.
Партиялық тыңдауды қорытындылай келе, «Нұр Отан» партиясы Төрағасының бірінші орынбасары ел Президенті белгілеп берген мемлекеттік қызметті реформалаудың түпкі мақсаты халық пен мемлекет мүддесін бәрінен жоғары қоятын кәсіби мемлекеттік аппарат қалыптастыру болып табылатынын атап өтті.
Ләйла ЕДІЛҚЫЗЫ,
«Егемен Қазақстан»
