Осыдан тура бір жыл бұрын Үкіметтің Қаулысымен бекітілген «Нәтижелі жұмыспен қамтуды және жаппай кәсіпкерлікті дамытудың 2017 – 2021 жылдарға арналған «Еңбек» бағдарламасының орындалу барысы кеше Солтүстік Қазақстан облысы әкімдігінің отырысында талқыланды.
Жобаға бір жылда 17,5 мың солтүстікқазақстандық қатысушы болыпты. Соның ішінде 14 мың адам жұмыспен қамтылған. Ал 9 мыңы тұрақты жұмысқа орналастырылған. Қазір кәсіпкерлікке 2 мыңнан аса адам оқып жатыр. Осының нәтижесінде өңірде жеке кәсіпкерлердің үлесі артып, қазір олардың саны 3200 адамға көбейіпті.
«Өз-өзін қамтамасыз еткендерді азайту, жаңа жұмыс орындарын ашу және бизнесті дамыту – біздің басты мақсаттарымыздың бірі. Биыл жеке кәсіпкерлер көбейді. Олар несие алып, кәсіптерін ашты. Осы жұмысты жалғастыру керек», деді облыс әкімі Құмар Ақсақалов өзінің сөзінде.